Экологиялық мәдениетті қалыптастыру мақсатында басталған «Таза Қазақстан» акциясы еліміздің барлық аймағында белсенді жалғасуда. Бір қуантарлығы, игі шара аясында тек қала мен ауыл іші емес, елді мекен сыртындағы демалыс орындары мен өзен-көл жағалаулары қоқыстан тазартылып жатыр.
Ақмола облысында «AMANAT» партиясының Бұланды аудандық филиалының ұйымдастыруымен «Таза бейсенбі» экоакциясы өтті. Игі шара аясында Макинск қаласының сыртындағы ақ қайың мен қарағайлы орман іші және бұлақ көзінің айналасы қоқыстан тазартылды. Бұл шаһар тұрғындарының жазда демалып, таза ауамен тыныс алатын сүйікті орны. Әр апта сайын өтетін тазалық акциялары аясында тек осы аумақтан 2 тоннадан артық қоқыс шығарылған.
Зәмзәгүл Әменова, Бұланды аудандық жастар ресурстық орталығының директоры:
Бұланды ауданының тұрғындарын тазалыққа шақырамыз және демалатын жерлерде болсаңыз, қоқыстарды жинап, тазалап жинап жүрулеріңізді сұраймыз. Тамаша табиғатты тазалықта ұстайық, аялайық. Баршаңызды тазалыққа шақырамыз.
«AMANAT» партиясы Шымкент қалалық филиалының қызметкерлері бүгін Қошқарата өзенінің бойын тазалады. Саяси ұйым мүшелері, коммуналдық тазалық жұмысшылары мен «Жастар рухы» өкілдері арнаны суда өскен өсімдіктер мен балдырлардан тазартып, жағалауды қоқыстан арылтты. Қошқар ата өзені — қала ортасындағы жер астынан бастау алатын бұлақ суы. Шаһарды қақ жарып ағатын арна мегаполистің эко климатын жақсартып тұрған табиғи аумақ.
Ердәулет Жүнісбек, «AMANAT» партиясы Әл-Фараби аудандық филиалының атқарушы хатшысы:
Тек сенбіліктерге шығып, тазалық жұмыстарын жүргізіп қоймай, идеологиялық бағытта тұрғындардың, жастардың экологтармен кездесулерін де ұйымдастырамыз. Халықты тазалықты сақтау мәдениетін қалыптастыру мақсатында және экологиялық ағарту бағытында кешенді жұмыстар жүргізіп келеміз.
Түркістан облысының Келес ауданында «Жастар рухының» белсенділері мен партия мүшелері Абай ауылындағы көпшілік серуендейтін орындарда тазалық жұмыстарын жүргізді. Сөйтіп, «Ауған соғысы ардагерлер аллеясындағы» шөптерді шауып, қоқыстарды жинады.
Оралда «Таза Қазақстан» акциясы аясында жастар тұрғын үй ауласындағы ойын алаңы жабдықтарын сырлап, жаңартты. Игі бастамаға жергілікті кәсіпкерлер қолдау көрсеткен. Белсенді жастар жаз бойына 50 ойын алаңын жаңартуды көздеп отыр.
Нұрсұлтан Сәрсенбаев, облыстық Жастармен жұмыс жөніндегі ресурстық орталығы басшысының орынбасары:
Қазір тек сырлау, тазалау жұмыстарын жүргізіп жатырмыз. Алдағы уақытта қолдау жақсы болса және құрал-жабдықтарымыз жеткілікті болса отырғыштардың арқасы сынған жерлерін, ағаштарын ауыстыру жоспарда бар.
Талдықорғанда «Таза Қазақстан» акциясы аясында ұйымдастырылған үздік бейнеролик байқауы қорытындыланып, жеңімпаздар анықталды. Жарыс «Менің эко-күнім», «Табиғат тіл қатады» және «Қоқыстан кейінгі өмір» деген үш тақырып бойынша өтті. Оған Жастар ұйымдарының мүшелері қатысты. Қатысушылар роликтерді сенбіліктер мен таза бейсенбілік кезінде өздері түсіріп, өңдеп, әлеуметтік желіге шығарған.
Маңғыстауда да «Таза бейсенбі» тазалық шарасы өтті. Бұл жолы экологиялық акцияға «AMANAT» партиясы Түпқараған аудандық филиалының өкілдері атсалысты. Олар Форт-Шевченко қаласындағы теңіз жағалауының 3 шақырым аумағын тазалап, 150 келідей қоқыс жинады. Белсенділер аудан тұрғындары мен қонақтарынан табиғатты аялап, тазалық сақтауға шақырды.
Бибінұр Әмірханқызы
