Маңғыстау облысында мүгедектігі бар адамдардың құқықтарын қамтамасыз ету және олар үшін қолайлы орта қалыптастыру бағытында жүйелі жұмыстар жүргізіліп жатыр. Соның нәтижесінде бүгінгі таңда өңірде 567 әлеуметтік инфрақұрылым нысаны толықтай бейімделген, деп хабарлайды Egemen.kz.
Бұл бастама Қазақстан Республикасында жүзеге асып жатқан бірқатар ірі бағдарламалар аясында іске асырылып жатыр. Атап айтқанда, 2025-2030 жылдарға арналған инклюзивті саясат тұжырымдамасы, «AMANAT» партиясының 2023-2027 жылдарға арналған жол картасы және Президент бастамасымен қолға алынған «Халықпен бірге» жобасы.
Еңбек және халықты әлеуметтік қорғау министрлігінің хабарлауынша, «AMANAT» партиясының жол картасына сәйкес, ел бойынша 42 мыңнан астам нысан интерактивті қолжетімділік картасына енгізілген. Бұл нысандарды кезең-кезеңімен бейімдеу көзделіп отыр: 2023 жылы – 20%, 2024 жылы – 40%, ал 2027 жылдың соңына дейін толық бейімделуі тиіс. Қазіргі уақытта республика бойынша 23 206 нысан қолжетімді етілді.
Маңғыстау облысы бойынша бейімделген 567 нысанның ішінде:
- Денсаулық сақтау мекемелері – 87;
- Білім беру ұйымдары – 259;
- Мәдениет орындары – 28;
- Мемлекеттік және квазимемлекеттік мекемелер – 73;
- Спорт нысандары – 9;
- Әлеуметтік қорғау мекемелері – 4;
- Сауда және ойын-сауық орталықтары – 81;
- Көлік инфрақұрылымы – 2;
- Басқа нысандар – 24.
«Нұрмұхан Жантөрин атындағы облыстық музыкалық-драмалық театрына барғанымда, ғимаратқа кіру қаншалықты қолжетімді болғанын көріп қуанып қалдым және жақында қаламыздағы ең үлкен супермаркет – «Динадан» сауда жасадым, онда көп тауар алуға өте ыңғайлы болды, кіріп-шығуға жағдай жасалған, тактильді плиталар, мүгедектерге арналған көрсеткіштер бар. Мен әрдайым бізге жасалған жағдайларға назар аударамын. Бұл – қала тұрғындары, соның ішінде біз үшін де ең жиі баратын орындар», деп екінші топтағы мүгедектігі бар Ислам Атакишиев ойымен бөлісті.
Бұдан бөлек, облыс бойынша Халықты әлеуметтік қорғау саласындағы реттеу және бақылау комитетінің департаменті тарапынан 2025 жылдың басынан бері 7 профилактикалық және 15 жоспардан тыс тексеру жүргізілді. Нәтижесінде 6 нұсқама беріліп, 6 нысан әкімшілік жауапкершілікке тартылды. Айта кету керек, бұзушылықтар алғаш рет анықталған жағдайда тек нұсқама беріліп, егер ол уақытылы орындалмаса, айыппұл салынады.
2025 жылдың соңына дейін Маңғыстау облысында тағы 368 нысанды бейімдеу жоспарланған.
