Opta аналитикалық порталының деректеріне сүйенсек, футболдан клубтық әлем чемпионатының жеңімпазы француздың ПСЖ командасы болады, — деп хабарлайды Massaget.kz тілшісі.
Клубтық әлем чемпионатының плей-офф кезеңі бүгін, 28 маусымда басталады. Биыл бұл турнирге алғаш рет 32 команда қатысып отыр, алайда олардың 16-сы топтық кезеңде жарыстан шығып қалды.
Суперкомпьютер клубтық әлем чемпионатына қатысатын командалардың жағдайын талдап, турнирдің басты фавориті ретінде Чемпиондар лигасының қазіргі жеңімпазы — "Пари Сен-Жермен" клубын атады. ПСЖ-ның турнирде жеңіске жету ықтималдығы 20,6 пайыз деп бағаланған.
Екінші орында — "Манчестер Сити" (20,4%), ал үшінші орынға миландық "Интер" (12,4%) жайғасты.
Еске салайық, турнир қатысушылары жалпы 1 миллиард доллар көлеміндегі қомақты жүлде қоры үшін бақ сынайды. Оның бір бөлігі командаларға турнир нәтижесіне қарамастан беріледі, ал қалғаны — жарыстағы жетістіктеріне байланысты үлестіріледі.
Топтық кезеңдегі әрбір жеңіс клубқа 2 миллион доллар, тең ойын – 1 миллион доллар әкеледі. 1/8 финалға шығу үшін — 7,5 миллион, ширек финал — 13,125 миллион, жартылай финал — 21 миллион, ал финалистер — 30 миллион доллардан табыс табады.
Аптаның басты оқиғалары мен пайдалы видеоларды көру үшін YouTube арнамызға жазылыңыз
