Швецияда "Стокгольм синдромы " терминінің пайда болуына себепкер болған қарақшы Кларк Улофссон 79 жасында қайтыс болды, — деп хабарлайды Massaget.kz тілшісі The Local басылымына сілтеме жасап.
"Стокгольм синдромы" — бұл жәбірленушілердің қылмыскерге деген жанашырлық, аяушылық сезімімен байланысты термин. Ол алғаш рет 1973 жылы Норрмальмсторг алаңындағы банк тонау оқиғасынан кейін қолданысқа енген.
Ол оқиғада Ян-Эрик Ульссон есімді қылмыскер түрмеден уақытша босап шығып, қайтадан банк тонауға бел буып, төрт адамды кепілге алған. Ол полициядан досы Кларк Улофссонды банкке алып келуді талап еткен. Банкті қоршау алты күнге созылып, оқиға швед телеарнасында алғаш рет тікелей эфирде көрсетілді.
Қылмыскерлер мен кепілге алынғандар арасында ерекше байланыс орнап, кепілдегілер қымыскерлерді қорғап шыққан. Мысалы, бір әйел кепілден босатылмай тұрып, Швеция премьер-министріне қоңырау шалып:
"Мен Кларктан және ана жігіттен қорықпаймын, мен полициядан қорқамын. Түсінесіз бе? Мен оларға толық сенемін. Неден қорқуым керек? Полиция бізге бірдеңе жасай ма деп, банкке шабуыл жасай ма деп қорқамын" – деген.
Кейін Ульссон 10 жылға бас бостандығынан айырылды. Түрмеде ол жанкүйерлерінен хаттар алып, тіпті кепілде болған әйелдермен де көрісіп тұрған. Ал Улофссон өзін кепілде болғандарға көмектесуге тырыстым деп дәлелдеп, жауапкершіліктен құтылып кеткен.
Осы бір мінез-құлық психологиядағы жаңа құбылыстың негізін қалады. "Стокгольм синдромы" терминін швед криминологы Нильс Бейерот енгізген, дегенмен ғалымдар бұл құбылыстың ғылыми негізі жөнінде әлі күнге дейін таласып келеді.
Қызықты жаңалықтар мен видеоларды көру үшін TikTok арнамызға жазылыңыз!
