Павлодар облысында әділдік іздеген кәсіпкердің мәселесі оң шешімін тапты.
Жерді он жылға жалға алған Александр Веретенников жергілікті атқарушы билік тарапынан әкімшілік кедергілерге тап болдым дейді. Себебі әкімдік жерді пайдалану мерзімі аяқталмай жатып, басқа тұлғаның атына аударып жіберген. Бірнеше мәрте сотқа жүгінгенімен нәтиже шықпапты. Өйткені кәсіпкердің пайдасына шешілген сот шешімі орындалмаған. Осыдан кейін ол соңғы үмітін арқалап Сыбайлас жемқорлыққа қарсы күрес қызметіне барады. «Бизнеске жол» жобасы аясында құзырлы органдардың араласуымен бұл мәселе қайта қаралды. Нәтижесінде жер пайдалану құқығы заңды түрде иесіне қайтарылды. Сөйтіп, бизнес пен мемлекет арасындағы әкімшілік кедергілер жойылып, агроөнеркәсіп саласының өкілі өз жұмысын қайта жалғастыруға мүмкіндік алды.
Данияр Кәукенов, сыбайлас жемқорлыққа қарсы қызмет департаменті превенция басқармасының бастығы:
- Жергілікті атқарушы органдармен, атап айтқанда Ақсу қаласы әкімдігімен бірлесіп, құқықтық жол іздестірілді. Нәтижесінде әкімдік тиісті қаулы шығарып, жер пайдаланушымен арада шарт жасалды.
Елена Аймаканова, шаруа қожалығының заңгері:
- Сыбайлас жемқорлыққа қарсы іс-қимыл бюросы «Заң және тәртіп» жобасы аясында өте жедел әрекет етті. Біз құжаттарды 2024 жылдың қараша айында алуымыз керек еді. Міне бар болғаны үш-төрт күн ішінде қолымызға тиді.
