Қала тұрмақ, ауыл аймақта электрлі самокаттар қаптады. Бұл көлікті жалға алатындардың дені – оң-солын тани қоймаған жеткіншек. Биыл осы самокаттардың кесірінен 21 жол апаты болған. 23 адам жарақат алған. Былтыр 15 жол апаты болып, бір адам опат болған еді.

Иә, адам опат болып жатыр. Бұдан кейінде самокатты жол үстіне көлденең тастап кете беретіндер көбеймесе, азаймасы тағы анық. Не істемек керек? Апат бола қалса, айыппұлды кім төлейді? Самокатты жалға алушы ма, жалға беруші ме?

Жүйткіген самокат, желіккен бозбала. Қала көшелерінде жүргіншінің зәресін алып, жұртты баса-көктеп өте шығатындар көп. Өте шықса жақсы, мүлт кетіп соғылса қиын. Салмақты самокат бала тұрмақ, үлкенді мертіктіруі мүмкін. Одан қалды самокатты жол ортасына тастап кететіндер көп.

Қала бойынша самокаттар үшін арнайы белгіленген 2000-ға жуық тұрақ бар. Яғни кез келген жерге тастай салуға болмайды. Радиусы 10 метрді құрайтын тұрақтар адамдар көп жүретін жерлерге қойылған.

Әлібек Әбілқасов, «JET» Астана қалалысының филиал директоры:

- Самокаттарды кез келген жерге қалдыруға болмайды. Ол үшін арнайы орындар қарастырылған. Кептеліс басталып, тіршілік қызғанда жалға алушылардың саны күрт артады. Сонымен бірге қолданушылар 90 теңге төлеп, сақтындыру қызметін қоса алады. Ол 400 мың теңгеге дейінгі залалдарды өтейді. Ал түнде самокат тізгіндейтіндер арнайы шағылыстырушы киім не аксессуары болуы қажет.

Электросамокаттар тебу – жай ғана қозғалыс емес, жауапкершілікті талап ететін әрекет. Қауіпсіздік ережелерін бұзған жағдайда заң бойынша әкімшілік жауапкершілік бар. Егер самокат жол-көлік оқиғасына себеп болса, айыппұл көлемі де артады.

Бауыржан Тоқжұманов, Астана қаласы ПД Әкімшілік полиция басқармасының бөлім бастығы:

- Егер самокат белгіленбеген жерде тұрса, не болмаса жаяу жүргіншілерге кедергі туғызатын жағдайда электросамокат кімге тиесілі, сол мекемеге айыппұлдар салынады. Ал егер де жаяу жүргіншілерге арналған жолда, мысалы, жүретін жағдай болса, ол жаяу жүргіншіге кедергі туғызбау керек және оның салдарынан жаяу жүргінші өзінің бағытын ауыстыруға тиісті емес.

Электросамокат жүргізушісі жол ережесін бұзса – 2 айлық, ал жол апатына себепші болса, 10 айлық есептік көрсеткіш мөлшерінде айыппұл төлейді. Бірақ көшеде тұрған бұл көлік түрін ақысын төлеген кез келген адам теуіп кете беретінін ескерсек, қауіп азаймайтын түрі бар.

Авторлары: Сержан Айтжан, Қанат Махмутов