Қостанай облысында медицина қызметкерлерінің кәсіби мерекесіне орай 20 жаңа жедел жәрдем көлігі табысталды. Алайда бұл қуанышты жаңалық көп ұзамай дауға айналды. Себебі жаңа көліктер – УАЗ-452 маркасындағы ескі үлгідегі, жұрт арасында «буханка» аталып кеткен машиналар, деп хабарлайды Skifnews.kz ақпарат порталы.
Бұл көліктер алғаш рет өткен ғасырдың 60-жылдары Кеңес Одағында шығарылған. Жаңа техника Ульяновск автозауытында құрастырылып, «Автодом» компаниясы арқылы алынған. Жергілікті бюджеттен бұл мақсатқа 320 миллион теңге бөлінген. Әр көліктің құны – шамамен 16 миллион теңге.
Ашық сары түске боялған көліктер ауылдық жерлердегі медициналық қызметті жақсарту үшін сатып алынған. Бұл туралы көліктердің кілтін табыстаған облыс әкімінің орынбасары Гүлбарам Мұсағазина мәлімдеді. Оның айтуынша, бұл қадам «медициналық көмектің қолжетімділігі мен сапасын арттыруға» бағытталған.
Алайда медицина саласының мамандары бұл шешімді қолдамады. Дәрігерлер мен фельдшерлер мұндай көліктердің қазіргі талаптарға сай келмейтінін, тіпті науқастар өміріне қауіп төндіруі мүмкін екенін айтып отыр.
Фельдшер Марияның сөзіне сенсек:
«Бізде қала ішінде Hyundai, JAC, Ford секілді көліктер бар. Олар кең, заманауи құрылғылармен жабдықталған. Бірақ олар да ұзаққа шыдамайды – шақырту көп, күндіз-түні жұмыс істейміз. Ал мына „буханка“ – іші тар, құрал-сайман сыймайды. Бұл – науқасты емдеуге емес, тек алып кетуге арналған көлік. Реанимобиль емес, такси секілді. Бізге мұндай техника емес, нағыз жедел жәрдем керек».
Желіде де бұл жаңалық қызу талқылануда. Көпшілік жергілікті биліктің шешімін сынап, заманауи медициналық көліктердің орнына жарты ғасыр бұрынғы үлгілерге қайта оралуын түсіне алмай отыр.
УАЗ-452 – алғаш 1965 жылы шығарылған. Қарапайым конструкциясы мен жол талғамайтын мүмкіндігі үшін кеңестік кезеңде танымал болды. Бірақ қазіргі медициналық стандарттарға сай келмейді.
