Мәжілісмендер еліміздің жаңа Салық кодексіне Сенат депутаттары енгізген түзетулерді қолдады, деп хабарлайды 24kz.
Парламент мақұлдаған құжат енді Президенттің қол қоюына жіберіледі.
Айта кетейік, бұған дейін Жоғарғы палата Салық кодексіне шаруа қожалықтарының табысына дара кәсіпкер сияқты 230 000 АЕК-тен асқан жағдайда 15% мөлшеріндегі жеке табыс салығын салуды ұсынған еді. Қолданыстағы 70% жеңілдікті ескерсек, оның нақты мөлшерлемесі 4,5% болады. Жаңа салық кодексі күшіне енген соң Қазақстан қор биржасынан түскен дивидендтер жеке табыс салығынан босатылады. Бұдан бөлек, кемінде 10 мүмкіндігі шектеулі адам жұмыс істейтін кәсіпорындар қосымша құн салығын төлемейді. Құжатта инвесторларды ынталандырудың қосымша шаралары, табиғи ресурстарға салық салудың тиімділігін арттыру нормалары бар. Аса қымбат көлік, кеме мен ұшақ секілді сән-салтанат заттарына ішкі нарықта да салық салынады.
