Елімізде халық саны тығыз орналасқан Түркістан облысында 6 мыңнан аса мемлекеттік қызметші бар. Бұл республика бойынша ең көп көрсеткіш саналады. Соңғы кезде бұл мамандыққа жастар да бет бұра бастады. Себебі мемлекеттік қызметтегі қазіргі талап күшті. Заман ағымына ілесіп, уақытпен санаспай жұмыс істеу керек.
Бұл өрт сөншірушілер емес. Мемлекеттік қызметшілер. Ордабасы ауданындағы демалыс орындарының бірінде өрт шықты дегенді ести сала Қажымұқан ауылы әкімдігінің мамандары сол жерден табылды. Барлығы бір кісідей жұмылып, тілсіз жауды ауыздықтауға атсалысты.
Арыс Беймахамбетұлы, бас маман:
Қазір табиғат аясынан шыққан өртті өшіріп жатырмыз. Мына жерде ЧС-тің қызметкерлерімен біріге отырып, қандай жағдай болмасын, қандай қызмет болмасын ауылда болып жатқан бүкіл жағдайларға атсалысамыз.
Ауыл әкімдігіне қарасты жеті елді мекенде 26 мыңға тарта халық тұрады. Оларға 14 маман қызмет көрсетеді. Мұнан да үлкен ауылдық округтер бар. Бірақ барлық қызметкерге бірдей міндет жүктелген. Ауылдарды аралау, халықтың мәселесін зерделеп, оны шешу жолдарын қарастыру керек. Сондықтан жергілікті жердегі мемлекеттік қызметкердің жұмысы әдеттегідей сегіз сағатқа сыя бермейді.
Бауыржан Нұрпейісов, Қажымұқан ауылдық округінің әкімі:
Халық көбінесе тұрғын үй салу мен жер мәселесі бойынша келеді. Одан кейін ортақ жайылым мәселелері бойынша келеді. Ол сала бойынша бір маманға ауыртпашылық түсетін болса, қалған қызметкерлерді де сол салаға жұмылдыра отырып, мәселені шешеміз.
Мемлекеттік қызметшілердің еңбегі де тұрғындардың тұрмыс тіршілігімен бағаланады. Бұл ретте Қажымұқан ауылдық округінде атқарылған жұмыс көп, дейді жергілікті халық. Елді мекендердің инфрақұрылымы жақсарып, ескірген жолдар қайта жөнделе бастаған.
Қалдарбек Оңалбеков, Темірлан ауылының тұрғыны:
Темірлан елді мекені танымастай өзгеріске еніп отыр. 24 сағат бойы су бар. Газ мәселесі де шешілген. Ал егер бір жағдай болып, жарық өшіп тағы басқа жағдай болса, аудан әкімшілігі араласып, жұмысты істеп жатады. Тұрмысы нашар отбасыларға үй беріліп, олар қуанып жатыр.
Жыл өткен сайын мемлекеттік қызметшілерге де талап күшейді. Жылдан жылға жалақы көтеріліп, оқыған жастар осы мамандыққа көптеп келе бастады. Қазір өңір бойынша мемлекеттік қызметшілер арасындағы жастардың үлесі 38 пайызға жеткен. «Болашақ» бағдарламасын тәмамадаған түлектер де аймақтың дамуына өз үлесін қосып келеді.
Айнұр Әбілқасымқызы
