Шерубай-Нұра су қоймасының жағалауындағы жаңа жобаларға инвестиция салынып жатыр. Енді маусымдық демалыс аймағынан бастап жыл бойғы жұмыс істейтін демалыс кешендеріне дейін жаңарады, деп хабарлайды Egemen.kz.
Жалпы Шерубай-Нұра су қоймасының жағалауындағы Топар кентіне Қарағандыдан және серіктес қалалардан, көрші аудандардан демалуға адамдар көп келеді. Бүгінде мұнда қонақ үйлері, бассейндері, балалар алаңдары және түрлі ойын-сауықтары бар 30-дан астам демалыс аймағы бар. Жазда мұнда катамарандар, су мотоциклдері, батуттар, ал қыста — қар көліктері, балық аулау, монша қызметі бар. Демалыс күнінің мұндай форматы барған сайын сұранысқа ие болып келеді.
– Топарға келушілер күн санап өсіп келеді. Өткен жаздың өзінде демалушылар саны 30 мыңнан асты. Сұраныстың артуына байланысты туристік инфрақұрылымға инвестициялар артуда, – дейді Абай ауданының кәсіпкерлік және өнеркәсіп бөлімінің басшысы Дарижан Мырзахметова.
Коттедждер, қонақ үй, мейрамхана және монша кешені бар жаңа демалыс аймағын салу бойынша ауқымды жобалар іске асырылуда. Тағы екі заманауи аймақтың жобалары әзірленуде және қолданыстағы нысандар кеңейтіледі.
Бұл жерге туристердің жайлы жетуіне, жазда және қыста демалуы үшін қолайлы жағдай жасалып жатыр.
Қарағанды облысы
