Белсенді жұмыс басталып кетті. Астанада Қазақ-қытай инвестициялық жобалары іске асуда, деп хабарлайды 24kz.
Құны 1,3 млрд доллар болатын су құбырының құрылысы жүргізіліп, тағы 150 млн долларға логистикалық парк салынады. Елорда әкімі Жеңіс Қасымбек қытайлық серіктестермен бірнеше келісімге қол қойды. Олардың қатарында осы күзде LRT-ны сынақ режимінде іске қосу жоспары да бар.
«Қазір 150-ге жуық Қазақстан азаматы Қытайда тағылымдамадан өтіп жатыр. Меморандум қытайлық серіктестермен бірлесіп, жеңіл рельсті көлік жүйесін пайдалануды көздейді», — деді әкім. Бұдан бөлек, Ақмола облысының республикалық индустриялық аймағына 1,1 трлн теңге инвестиция тартылды. Ауданы 1 мың гектарға жуық аймақ елордаға жақын орналасқан. Бұл жаңа зауыттар мен өндіріс ошақтарын ашуға қолайлы жер. Қазір онда 7 жоба жүзеге асырыла бастады. Соның аясында 4,5 мыңнан астам жұмыс орны ашылмақ.
