Атырау облысы "Ақжайық" резерватындағы жұмыс әлі де жалғасып жатыр. Өртке қарсы 150-ге жуық адам, 40 техника және 2 тікұшақ жұмылдырылған, — деп хабарлайды Massaget.kz тілшісі.
Атырау облысының әкімі Серік Шәпкенов "Ақжайық" мемлекеттік табиғи резерваты аумағындағы өрт салдарын жою жөнінде жедел штабтың көшпелі отырысын өткізді.
Жедел деректерге сүйенсек, өрт оқшауланған, ашық жалын ошақтары анықталмаған. Шымтезек пен қамыс бықсып жанып жатыр, негізгі күш осыны тоқтатуға бағытталған.
"Жұмыс тәулік бойы жүріп жатыр. Өрт қайта шығуына жол бермеу үшін жалын шарпыған аумақтарға су шашылып, топырақ төгіліп жатыр", — деп жазылған хабарламада.
Резерваттағы терең ошақтарды анықтау үшін тепловизор дрон қолданылып жатыр.
Облыс әкімі Серік Шәпкенов жедел штаб отырысында "Ақжайық" резерватындағы өрттің шығу себептеріне қатысты пікір білдірді.
"Әлеуметтік желілерде өрттің шығу себептеріне байланысты түрлі болжам айтылып жатыр. Тиісті органдар менің тапсырмам бойынша бұған себеп болуы мүмкін барлық жағдайды, нұсқаларды жан-жақты тексеріп жатыр", — деді облыс әкімі.
Аймақ басшысы өрт адам қолымен, әсіресе, қасақана қойылғаны анықталса, кінәлілер заң аясында жауапкершілікке тартылатынын мәлімдеді.
Серік Шәпкенов "Ақжайық" резерватындағы өрт бұрын-соңды дәл осылай ұзаққа созылмағанын айтты.
"Каспий теңізінің тартылуы, қамыстың шамадан тыс көбеюі аймақта күрделі мәселе тудыруы мүмкін. Экология және Төтенше жағдайлар министрліктерімен бірлесіп, болашақта мұндай жағдайға жол бермеу үшін кешенді іс-шаралар жоспарын қабылдауды мақсат етіп отырмыз", — деді ол.
Қызықты жаңалықтар мен видеоларды көру үшін TikTok арнамызға жазылыңыз!
