Танымал әнші Ұланғасыр Қамиев жаңадан салынған зәулім үйіне достарын шақырып, қоныстой жасады. Әнші қонақтарының әкелген сыйлығын Instagram желісіндегі парақшасында көрсетті, деп хабарлайды KAZ.NUR.KZ.
Жақында әнші Ұланғасыр Қамиев жаңадан салынған екі қабатты зәулім үйіне көшіп келген. Ол қоныстойға достарын шақырған.
Кейін әнші желідегі парақшасында қонақтардың қандай сыйлық әкелгенін көрсетті.
Ұланғасыр Қамиев жариялаған видеодан әншінің досы, белгілі актёр Дәулет Үсербай өзі уәде еткен тайды жетектеп алып кіргенін байқауға болады.
"Ал, бауырым, қоныс той құтты болсын! Ұланғасыр бауырымыздың туған күнінде "үйіңе кірсең бір тай" деп уәде етіп едім. Сол бүгін сәті келіп, бауырымызға бір сәйгүлік мінгіздім. Үйленіп, осы атқа мінетін салиқалы ұрпақтарың көп болсын", — деді Дәулет Үсербай.
Әншінің әзілкеш достары да қоныстойға ерекше сыймен келген. Олар көліктің жүк салғышынан екі қойды түсіріп, әншіге тарту етті.
"Үйіңнің іші жанға, сырты малға толсын деген ниетпен, бір басың екеу болсын деген ниетпен бір емес, екі қой алып келдік", — дейді олар.
Ұланғасыр Қамиев достарының ерекше сыйына ризашылығын білдірді.
"Бір марқайып қалдым, осындай достар аман болсын", — делінген видео сипаттамасында.
