Астанада жыл басынан бері өзгенің мүлкін бүлдіру ісі бойынша 100 оқиға тіркелген, деп хабарлайды 24KZ. Аялдамалар мен лифттерді сындырып, подъездерге сурет салғандар 6,5 млн теңгеден астам айыппұл арқалады . 60 бұзақы қамалды.
Мына көліктің алдыңғы жағы майысып, әйнегі сынған. Бұл елордада болған оқиға. Жасөспірімдер осылай көңіл көтермек болған. Видеода бір топ жеткіншектің бөтеннің мүлкін бүлдіріп жатқаны анық көрініп тұр. Тұрғындардың айтуынша, бұл бұзақылар ауладағы ойын алаңдары мен лифтті бүлдіріп, қабырғаға сурет салады.
Анар Наурызалиева, қала тұрғыны:
- Мына әткеншек өткенде ғана аман болатын. Қазір бүлінген. Әкімдік жасайды, адамдар құртады. Меніңше, бұны түнде жасөспірімдер сындырып жүр.
Осындай арыз-шағымдар апта сайын түседі. Жыл басынан бері 100-ден астам азамат әкімшілік жауапкершілікке тартылған.
Қанат Нысантаев, Астана қаласы ПД Жергілікті полиция қызметі басқармасы басшысының орынбасары:
- 147-баптың 1-ші бөлігінде бұл құқықбұзушылық үшін 50 айлық есептік көрсеткіш көлемінде айыппұл салу немесе 5-тен 20 тәулікке дейін бас бостандығынан айыру жазасы көзделген. Егер азамат ол қылмысты бір жыл ішінде қайталаса, 20-30 тәулікке қамалады.
Бұзақылықпен күрес жан-жақты жүріп жатыр. Полицейлер әлеуметтік желілер мен бақылау камераларын қадағалайды. Күнделікті рейдтерге шығып, түсіндіру жұмыстарын жүргізеді. Бірақ мамандар: «Мұндай қылмыстың тамырына балта шабу үшін салдарымен емес, себеппен күресу керек», – дейді.
Бақытжан Бектенов, Астана қаласы Урбанистика орталығы директорының орынбасары:
- Осы бағыттағы зерттеулер, қаланы абаттандыру қылмысты 10-15% азайтатынын көрсеткен. Айналада парктер, скверлер мен аллеялар болса, адамдар қыдырады. Яғни бұзақылар көпшілік ортада қылмыс жасауға именеді. Сонымен қатар жарықтандырылған учаскелердің көп болуы да маңызды.
Бүгінде елордада да осы бағыттағы жұмыстар қарқын алып келеді. Жаңа концепция бойынша тұрғындар барлық қажетті инфрақұрылымға 15 минутта жетуі керек. Сонымен қатар қоғамдық орындар саны көбейіп, жаяу жүргіншілерге жағдай жасалмақ. Яғни қала басшылығы бұзақылықпен кешенді түрде күресіп жатыр. Сонымен қатар «Стоп, вандал» акциясы арқылы танымал адамдар тәртіпке үндеп жатыр. Нәтижесінде қылмыстар саны азайған.
Авторлары: Серік Селеубайұлы, Гүлдана Қален, Мерей Талап
