Ел ішін обыр меңдеп тұр.
Былтыр 41 мыңнан астам адамнан аты жаман ауру анықталды. Бұл он жылдықтағы орташа көрсеткіштен 3,2 пайызға көп. Әсіресе сүт безіндегі қатерлі ісік, тоқ және тік ішек, өкпе обыры белең алған. Дегенмен, дертке қарсы күресте жаңа технологиялар қолданылып, дәрігерлер барынша күресіп келеді. Сол себепті науқас саны көбейгенімен бұл ауру түрі бойынша өлім-жітім азайған.
236 мың жан. Осынша адам үміт пен күдіктің ортасында күн кешіп жүр. Олардан онкологиялық аурулар анықталған. Айтайық, он жылда обыр 21 пайызға көбейді. Ең сорақысы, сырқат жыл санап жасарып келеді. Яғни дерт кәрі ғана емес, жастарды да көп айналдыра бастаған.
Бейбіт Мұсабеков, Астана қалалық көп салалы медицина орталығының бөлім меңгерушісі:
- Жасына қарай сол 45-50 жастағылар сол көп болатын. Қазір осы сүт безі обыры кеңінен тарап жатыр. Қазіргі таңда осы күніне емханада қабылдау жүргіземіз. 25-30 жастағы науқастар өте көп келіп жатқандар. Ерте анықтау керек, скрининг ол жанағы сүт безінің обыры, скрининг қуық асты безі обыры, скрининг өкпе обырына байланысты бар бізде. Сол скринингтің пайда болуына байланысты адамдар ерте стадиямен келуде.
Иә, сырқаттың санының көбеюіне скрининг те себеп. Мамандар аты жаман аурудың алдын алу үшін тұрақты тексеріліп тұру керек, дейді. Дертті дер кезінде анықтап, уақытылы ем-дом жүргізілсе, жеңуге болады. Айтайық, былтыр науқастардың 56 пайызы құлан таза айыққан.
Батырбек Сәрсенбаев, Астана қаласының тұрғыны:
- Осы марттан бастап химия алып жатырмын осы жерден. Вес қостық. Мына жерде персонал бәрін қарайды, күн болсын, түн болсын. Кішкене температураң көтерілсе, осы жерден шықпайды. Жоқ деп ондай әңгіме болған жоқ. Қандай не береді, дәрі-дәрмектің, соның бәрі уақытылы алынып жатыр.
Өңірлерде барлығы 20 онкоорталық бар. Сондай-ақ елде екі ғылыми институт жұмыс істейді. Бұл сапқа 5 көпбейінді медициналық мекемені қосыңыз. Бас-аяғы бізде 5 мың төсек орынға есептелген орталықтар бар. Солардың бірі Астана қалалық көп салалы медициналық орталығы. Мұнда былтыр 17 мыңнан аса адам ем қыбылдады. Дені дертті жеңіп шыққандар. Ең бастысы, емді тоқтаттпай, дәрігердің кеңесіне құлақ асқан жөн дейді мамандар.
Мұхтар Төлеутаев, Астана қалалық көп салалы медицина орталығының директоры:
- Политивтік көмек деген көмек бар. Ол онкологияда да және басқа сырқаттардың түрінде де жасалынатын көмек. Бұл жерде адам ауырған адамға өмірінің сапасын төмендетпей ауырсынуды басатын дәрі дәрмек қолдану. Біздің Астанада біздің орталықта үлкен 130 төсек жұмыс жасап тұрған политивтік бөлімше бар. Онда 100 артық адам емделеді.
Ұжым құрамында 823 қызметкер еңбек етеді, оның 161-і дәрігер. Орталық заманауи құралдармен жабдықталып, мамандар емдеу ісіндегі тең тәсілдерді тұтас меңгерген.
Бейбіт Мұсабеков, Астана қалалық көп салалы медицина орталығының бөлім меңгерушісі:
- Әлемде иммунды онкологиялық терапия кеңінен тарап жатыр. Бұл енді дәстүрлі химия терапияның ішіне кіреді. Соның бір саласы. Ол препараттарды біздің науқастар қабылдап жатыр. Қазір әлемде оның үш түрі бар, оның үшеуі де біздің Астанадағы онкология орталығынба бар. Бұл емдеу түрінің ерекшелігі яғни бұл науқастарға химиямен бірге иммунитеттің ісікке қарсы тұруын күшейтеді иммунопрепараттар.
Дәтке қуаты, бұрын емге көнбейтін қылтамақтан да айығып жатқандар бар. Науқас ауруын асқындырып алмай дәрігерге неғұрлым ертерек көрінсе дерттің жазылуы да тез. Елде емдеу ісі ілгерлеп келеді. Ең бастысы, былтыр еоде қатерлі ісік ауруларынан болатын өлім-жітім 32 пайызға азайған.
Шернияз Жалғасбекұлы, Өрден Жарқын
