Биыл жыл басынан бері әлеуметтік-еңбек саласындағы мемлекеттік қызметтерді көрсету мақсатында 221,6 мың адамға SMS-хабарлама жолданған. Нәтижесінде, 116,9 мың адам ешқайда өтініш қалдырмай, жәрдемақы, сондай-ақ басқа да төлемдерді алу мүмкіндігін пайдаланған. Көл-көсір жұмыс отбасының цифрлық картасын іске қосқан соң үйлесім тапты.
Отбасының цифрлық картасы мемлекеттік органдардың қолданыстағы барлық ақпараттық жүйелерінің деректері негізінде қалыптасады. Қазір онда 20 миллион азамат немесе 6,2 миллионнан астам отбасы туралы ақпарат жинақталған. Мүмкіндігі мол цифрлық картаны енгізудегі негізгі мақсат мемлекеттік қолдау жүйесі отандастардың барлығына теңдей қолжетімді болса деген ұсыныстан туған. Осыған байланысты отбасының цифрлық картасы Әлеуметтік кодекске әлеуметтік саясаттың орта және ұзақмерзімді міндеттері мен бағыттарын айқындау құралы ретінде белгіленген. Сондай-ақ цифрлық карта азаматтардың әлеуметтік мәртебесіне байланысты кепілдендірілген мемлекеттік қолдаудың қандай да бір түрін алуға құқылы екенін ескертіп отыратын электрондық хабарлама.
Бүгінде Отбасының цифрлық картасы мемлекеттік қолдау шараларын алуға құқығы бар отандастарға қандай да бір өтінішсіз жәрдемақы мен әлеуметтік төлемдердің 11 түрін ресімдеуге мүмкіндік береді. Олардың ішінде еңбек ету қабілетінен айырылған жағдайда әлеуметтік төлем, жұмысынан айырылған жағдайда әлеуметтік төлем, асыраушысынан айырылу бойынша әлеуметтік төлем, бала туу мен күтіміне жәрдемақы, мүгедектігі бар баланы тәрбиелеп отырған ата-анасына (қамқоршысына) жәрдемақы, мүгедектігі бойынша жәрдемақы, көпбалалы отбасыларға берілетін жәрдемақы, «Алтын алқа», «Күміс алқамен» марапатталған көпбалалы аналарға берілетін жәрдемақы, атаулы әлеуметтік көмек, сондай-ақ жерлеуге арналған біржолғы төлем бар.
Бұдан өзге, цифрлық карта арқылы зейнетақы төлемдерін алу мүмкіндігі, «қандас» мәртебесі берілгенде немесе ұзартылғанда мәртебенің аяқталу мерзімі, жұмыссыз адамдарға жұмыспен қамту шаралары туралы автоматты хабарламалар жолданады. Мемлекеттік қолдау шараларын алуға құқық белгіленген кезде әлеуетті алушыға 1414 бірыңғай байланыс орталығынан SMS-хабарлама жіберіледі. Хабарлама алған азамат оған келісімі туралы жауап беруі керек. Өтінішті ресімдеу, әлеуметтік жәрдемақы немесе төлем тағайындау автоматты режімде жүргізіледі. Осыдан кейін қаражат төлем алушының банк шотына аударылады.
