Елімізде үлескерлердің құқығы заңмен қорғалатын болды . Бұдан былай құрылысқа тиісті рұқсаттары болмаса, құрылыс компаниялары азаматтардан ақша тарта алмайды.
Бүгін Сенатта үлескерлерді қорғауға қатысты заң екі оқылымда қаралып, мақұлданды. Құжат үлестік құрылыс саласын мемлекеттік реттеуді күшейтуге бағытталған. Сонымен қатар қолма-қол ақшаны қабылдауға тыйым салынады. Демек алдын ала брондау, инвестициялау шарттары заңсыз болады. Сонымен қатар рұқсатсыз салынып жатқан үйлердің жарнамасына жол жоқ. Әрі бірыңғай оператордың кепілдігінсіз салынған жылжымайтын мүлікке ипотека рәсімдеу мүмкін болмайды.
Өнеркәсіп және құрылыс министрлігінің мәліметіне сүйенсек, елімізде 99 үй рұқсатсыз салынған және 42 «сақалды» құрылыс бар.
Мәулен Әшімбаев, ҚР Парламенті Сенатының төрағасы:
- Мақұлданған заң үлестік құрылыс саласында мемлекеттік реттеуді күшейтуді көздейді. Осы мақсатпен үлескерлердің құқықтарын қосымша қорғауды қамтамасыз ететін түзетулер топтамасы енгізілді. Заңда мүгедектігі бар адамдарды тасымалдауға қатысты қызметті оңтайландыруды көздейтін өзгерістер де бар. Сонымен қатар автомобиль жолдарын мемлекеттік басқарудың негіздерін жетілдіруге бағытталған ережелер қарастырылды. Жалпы заң үлескерлерді сенімсіз құрылыс компанияларынан қорғауға, ерекше қажеттілігі бар азаматтардың өмір сүру сапасын жақсартуға және басқа да өзекті мәселелерді шешуге оң септігін тигізеді деп сенеміз.
