Польшада трактор жүргізушісі тапшы.
Жүк көлігін айдайтын 30 мың маман жетіспейді. Жергілікті жұмыспен қамту қауымдастығы келтірген дерек осындай. Әсіресе оңтүстік және батыс аймақтарда мәселе өткір тұр. Билік түйткілді шешу үшін жыл сайын жүк көлігі жүргізушілеріне алыс-жақын елдерге ашық вакансия жариялайды. Польшада трактор айдауға Азия елдерінен адамдар көп келеді. Қазақстан мен Қырғызстаннан да өтініш білдірушілер қарасы қалың. Кейінгі дерекке сүйенсек, қазір Польшада 160 мың маман сырттан келіп жұмыс істейді. Олардың жалақысы шамамен 2100 доллар, бұл біздің ақшамен 1 млн 60 мың теңге.
ЦИТАТА
Мацей Вроньски, Польша жұмыспен қамту қауымдастығының өкілі
Жүк көлігін жүргізу – отбасы мен жақындарынан үнемі жырақта жүріп, жауапкершілікті талап ететін күрделі жұмыс. Сол себепті көбісі мұндай ауыр жұмысты атқаруға ынталы емес.
Кадр тапшылығы тек көлік және логистика саласында ғана емес, ауыл, орман, балық шаруашылығы мен құрылыс секторында да қатты сезіледі. Жеміс жинау, кірпіш қалау, дәнекерлеу, балық аулау сияқты маусымдық жұмыс жеткілікті. Бірақ маман жоқ. Қазір мұндай жұмыстарды көбіне қақтығыстан қашып келген украиналықтар атқаратын болған.
Марокко маусымдық жұмысшыларға зәру
Мароккоға маусымдық жұмысшылар ауадай қажет. Өйткені мыңдаған гектар аумақты алып жатқан егістік алқаптарында өнім терілмей тұр. Шаруалардың ала жаздай еккен егінінде жиын-терін жұмыстары уақытылы жүргізілмесе, еңбек далаға кеткелі тұр. Сарапшылар мұның себебін жергілікті тұрғындардың өз елінде жұмыс істемей, жақсы өмір іздеп Еуропаға қарай ағылумен байланыстырады. Қол күшінің жоқтығынан кәсіпкерлер егістік аумағын қысқартуға мәжбүр. 3700 гектар жерді алып жатқан шаруашылық алқабын биыл 2300-ге дейін қысқартқан.
ЦИТАТА
Отмане Михбал, жергілікті жидек өсіру қауымдастығы директорының орынбасары
Жұмыс күші тапшылығы – Марокконың барлық аймағына әсер етіп отырған мәселе. Жағдайдың қиындағаны соншалық оларды алыс аудандардан іздеуге тура келеді. Бұл шығынды арттырып, ағаш қию, өнімді жинау сияқты процестің уақытылы жүргізілуіне кедергі келтіреді. Сол себепті жұмыс күші тапшылығы көп шаруаны алаңдатып отыр.
Грекияда қызмет көрсететін мамандар жетіспейді
Жаз басталысымен Грекияда туристік маусым қызады. Бірақ елге келген мейманды жайғап, қызмет көрсететін маман аз. Әсіресе, қонақ үй қызметкерлері мен даяшылар жоқтың қасы. The Guardian басылымы келтірген дерекке сүйенсек, осындай 80 мың жұмыс орны бос тұр. Сондықтан, грек билігі мамандарды Мысыр, Вьетнам, Бангладеш, Грузия, Үндістаннан шақырмақ. Осы жазда 30 мың жұмысшы Афинаға барады. Бұл сол елдермен Грекияның еңбек министрлігі жасасқан өзара келісім аясында жүзеге асырылады.
ЦИТАТА
Йоргос Хотцоглу, қоғамдық тамақтану және туризм федерациясының президенті
Кадр тапшылығы Грекияда пандемия кезінде қатты сезілді. Мәселе елде қазір де өткір тұр. Көп салада білікті мамандардың жетіспеушілігі байқалады. Себебі, карантин кезінде жұмысын тастап кеткен тәжірибелі қызметкерлердің көбі қайта оралмады.
Франция шетелдік жұмысшыларға виза беруді жеңілдетеді
Еуропада жұмыс күшіне зәру Грекия ғана емес. Франция да мұндай мәселеге тап болды. Елдің денсаулық сақтау, құрылыс, ауыл шаруашылығы және туризм саласында маман жетіспейді. Мысалы, Парижде денсаулық сақтау қызметкерлерінің 60%-ы шетелден келген. Құрылыс саласында да физикалық еңбекті қажет ететін жұмыс күші жоқтың қасы. Ел үкіметі жұмыс күші тапшылығын шешу үшін иммиграция шараларын күшейтті. Шетелдік жұмысшыларды еңбек визасымен қамтуды қарастырып жатыр. Мұнан бөлек маусымдық виза беру көлемі артады.
Жаңа Зеландияда маусымдық жұмысшыларға уақытша виза беріледі
Жаңа Зеландияда шетелден келетін маусымдық жұмысшыларға виза беру тәртібін жеңілдетіп жатыр. Жаңа уақытша виза ауыл шаруашылығы, туризм және құрылыс сияқты салаларда жұмыс істеуге мүмкіндік береді. Құжат 9 ай мерзімге жарамды. Жұмыс уақыты аптасына 30 сағаттан аспайды. Ал сағатына 18 АҚШ доллары көлемінде жалақы төленеді. Бұл біздің теңгеге шаққанда 9 мың теңге.
