Алматы қаласы әкімі аппаратының басшысы тағайындалды, — деп хабарлайды Massaget.kz тілшісі қалалық әкімдіктің баспасөз қызметіне сілтеме жасап.
"Президент Әкімшілігімен келісім бойынша Алматы қаласының әкімі Дархан Сатыбалдының өкімімен Алматы қаласы әкімі аппаратының басшысы қызметіне Ерлан Исабеков тағайындалды", – делінген хабарламада.
Ерлан Исабеков әл-Фараби атындағы Қазақ ұлттық университетін және "Болашақ" бағдарламасы бойынша АҚШ-тағы Джорджтаун университетін тәмамдаған. Қолданбалы математика және экономика мамандығы бойынша магистр дәрежесі бар.
Еңбек жолын Алматы қаласындағы №131 мектеп-лицейінде математика пәнінің мұғалімі болып бастаған.
2000–2002 жылдары Мемлекеттік кірістер министрлігінде әртүрлі қызметтер атқарған.
2002–2008 жылдары Қаржы министрлігінің Кедендік бақылау комитетінде жұмыс істеген.
2009–2015 жылдары Республикалық бюджеттің орындалуын бақылау жөніндегі есеп комитетінде басшылық лауазымдарда қызмет еткен.
2015–2018 жылдары Президент Әкімшілігінің мемлекеттік бақылау және аумақтық-ұйымдастыру жұмысы бөліміне қарасты инспектор қызметін атқарған.
2018–2023 жылдары Ақмола облысы Егіндікөл ауданының және Жетісу облысы Қаратал ауданының әкімі болған.
Соңғы тағайындауға дейін Президент Әкімшілігінің мемлекеттік бақылау бөліміне қарасты мемлекеттік инспектор болып жұмыс істеді.
Еске салайық, 24 мамырда Мемлекет басшысының жарлығымен Дархан Сатыбалды Алматы қаласының әкімі болып тағайындалған болатын. Кейін Президент Қасым-Жомарт Тоқаев жаңадан тағайындалған әкімді қабылдап, мегаполисті дамытуға қатысты бірқатар маңызды тапсырмалар жүктеген еді.
Instagram парақшамызға жазылып, ең қызықты ақпараттарды бірінші болып оқыңыз!
