Күн райының өзгеруі мен жауын-шашынның аздығынан жерасты суы төмендеп барады, деп хабарлайды 24KZ. Мұндай табиғи құбылыс Түрістан облысында да байқалады. Мәселен, биыл Қазығұрт ауданында халықты тіршілік нәрімен қамтып отырған кейбір ұңғымаларда су төмендеп кеткен. Салдарынан Амангелді ауылындағы 700-ге жуық тұрғын тасымалданатын судан шөл басып отыр.
Жүзге жуық түтіні бар Амангелді ауылын сапалы ауызсумен қамту мақсатында 8 жыл бұрын гидрогеологиялық зерттеу жұмыстары жүргізілген. Нәтижесінде 25 жылға жететін су қоры анықталып, ұңғыма қазылған. Мамандар алғашында ішуге жарамды таза ауызсу шыққанымен, уақыт өте келе тіршілік нәрі тарылып, су деңгейі түсіп кететінін айтады.
Рүстембек Телібаев, мердігер компанияның өкілі:
- Бұл жерге геология 2016-2017 жылдары жүргізілген екен. Ол жерде дебит бар, тәулігіне 71 тонна су беріледі деп берілген. Бізге мына жерге жоба бойынша 175 метр қазуға жоба берілген. Біз сол жоба бойынша қаздық. Бірақ ол су 2022 жылы тоқтап қалды. Содан кейін біз өз есебімізден тағы бір скважина қаздық. Қазірге дейін су беріп тұрған сол скважина. Бірақ оның да суы төмендеп кетті.
Ауыл тұрғындары 3 жыл бұрын қазылған 2-ші ұңғыманың суы тұтас ауылды қамтуға жетпейтінін айтады. Сондықтан қазір ауыл тұрғындарын аудан әкімдігіне қарасты «Таза су» мекемесі тасымалдау арқылы тіршілік нәрімен қамтамасыз етіп отыр.
Шәріпбай Бейсебаев, Амангелді ауылының тұрғыны:
- Қазір аудан әкімі: «Уақытша», – деп жаңағы тасымалды ұйымдастырып берді. Әр үйге 200-300-500 литрге дейін беріледі. Күніге тасып жатыр. Жуынатыны бар, кір жуатыны бар, күніне жетеді сол.
Амангелді ауылындағы ауызсу мәселесін түбегейлі шешумен аудандық тұрғын үй-коммуналдық шаруашылық бөлімі айналысып отыр. Ондағылар мердігер мекемеге қайта ұңғыма қаздырып, қажетті мөлшерде су шығаруға міндеттеу үшін сотқа талап арыз түсірген. Қазір іс сотта қаралып жатыр.
Тұрдалы Абдакимов, аудандық ТҮКШ, жолаушылар көлігі және автомобиль жолдары бөлімінің басшысы:
- Соттың шешімі шыққаннан кейін заң талаптарына сәйкес тиісті жұмыстар жүргізіледі. Одан бөлек, халықты ауызсудан тарықтырмау мақсатында біз өзімізге қарасты «Тазасу» мекемесі тарапынан халыққа күніне 2 водовозбен су тасымалдап беріп жатырмыз. Ол жұмыстар ары қарай жалғасын табады.
Аудан әкімдігі Амангелді ауылындағы ауызсу мәселесі жақын арада шешілетінін айтады. Алайда жерасты суының неліктен төмендегені әзірге белгісіз. Суға жауапты облыстық мамандары оны биылғы құрғақшылық және жауын-шашынның аз түсуімен байланыстырып отыр. Себебі бұндай жағдай өңірдегі бірнеше ауданда байқалған.
Мұрат Әубәкірұлы, облыстық Энергетика және ТҮКШ басқармасының бөлім басшысы:
- Тек қана Қазығұрт ауданында емес, Сарыағаш, Келес аудандарындағы бірқатар елді мекенде су ұңғымаларының дебиті азайып жатыр. Себебі жауын-шашын аз болуына байланысты судың деңгейі өте төмендеп, қажетті көлемде жеткізу қиындық туғызып отыр. Осыған орай біз тиісті гидролог мамандарды арнайы бекітіп, ұңғымаға зерттеу жұмыстарын жүргіземіз. Тиісті шешімдер қабылданып, нақты ұсыныс енгізіледі.
Әлем ғалымдары жерасты суларының төмендеуін жаһандық жылыну және климаттың өзгерістермен байланыстырады. Әлем ғалымдары жерасты суларының төмендеуін жаһандық жылыну және климаттың өзгерістермен байланыстырады. Суға деген сұраныс жыл сайын артапаса кемімейді. Сондықтан бұл сала түбегейлі зерттеуді қажет етеді.
Авторлары: Жандос Жұмабек, Ербоат Әбіш
