Ақтауда «ҚазМұнайГаз» Ұлттық компаниясының ұйымдастыруымен қайырымдылық марафоны өтті. «Munaily Marathon-2025» шарасына мың адам қатысты. Олардың қатарында «ҚазМұнайГаз» компаниясына қарасты еншілес кәсіпорындарының қызметкерлері, кәсіби спортшылар мен қала тұрғындары да бар.
Биыл марафонға қатысуға ниеттілер көп болған. Бірақ жарысты өткізу тәртібіне сай бір мың адам жүгірді. Олар 5 және 10 шақырым қашықтықты еңсерді. Марафонға қызметтік киімдерімен келгендер де болды. Олардың бұл бастамалары еленіп, арнайы марапатталды.
Салтанат Нәсенова, «Caspi Bitum» БК» ЖШС химиялық талдау зертханасының маманы:
Бұл — менің бірінші марафоным. 5 шақырым жүгірдім. Осындай қайырымдылық қорымен бірге өткізіліп жатқан марафонға қатысқаныма өте қуаныштымын.
Меруерт Жалғасбаева, «Kmgep Catering» ЖШС қызметкері:
Біздің мекемеміз тағам саласында жұмыс істейді. Сол үшін де креатив болып, осындай киім үлгісін таңдадық. Жиналған ақша ауырып жатқан балаларға жұмсалады.
Спорттық шара «Жұмысшы мамандықтар жылына» орай ұйымдастырылған. Ұлттық компанияның басшысы Асхат Хасенов әр жұмысшыға алғысын білдіріп, марафон бірлік пен әлеуметтік жауапкершіліктің жарқын үлгісі болғанын атап өтті.
Асхат Хасенов, «ҚазМұнайгаз» ҰК АҚ басқарма төрағасы:
Біз Ұлттық компания ретінде жұмысшылар осы ауызбіршілікті дәріптеп, өзіміздің қоғамымызға ықпалымызды тигіземіз деген мақсатта ұйымдастырылып жатқан шара. Марафонның басты мақсаты — қайырымдылық.
Ұлттық компания бұқаралық спортқа әрдайым қолдау көрсетіп келеді. Қайырымдылық шараларға атсалысып, өңірлерде әлеуметтік жобаларды жүзеге асыруда. Ал марафоны арқылы жиналған 5 млн теңге Жаңаөзен қаласындағы ерекше балаларға арналған «Балақай» оңалту орталығына жіберілді.
Аягөз Оралбайқызы
