Президенттің Астана халықаралық форумының ашылуында сөйлеген сөзі әлемде ушыққан үстіне ушығып бара жатқан ахуалға алаң көңілді дөп басады. Белгісіздік. Сын сағаты. Қалай жауап береміз?

Қандай шешім қабылдаймыз, қандай құндылықтарды қорғаймыз?! — деген Мемлекет басшысы, «Былтырғы мәліметке сәйкес, 52 мемлекет қарулы қақтығыс жағдайында тұрған. Ал осындай қатыгез әрекеттерден келген экономикалық шығын 19 триллион долларға жетті. Бұл шамамен әлемдік ІЖӨ-нің 13,5 пайызы» деген мысал келтірді.

«Осы сандардың арғы жағындағы ахуал одан да қорқынышты: қазіргі қақтығыстар анағұрлым ұзақ әрі күрделі сипатқа ие. Оған көптеген «ойыншылар», тіпті ешқандай мемлекетке қатысы жоқ топтар араласады. Бұдан бөлек, мұндай қақтығыстардың тамырында түрлі қайшылықтар жатыр».

«Айрықша алаңдаушылық туғызатын тағы бір дүние бар. Ол – әлемдегі осы тектес шиеленістердің жаһанға мүлдем жаңа түсінік пен құндылықтар ұсынып, адамзатты түбегейлі түлеген, бірақ әзірге беймәлім келешекке бастап бара жатқан жасанды интеллектінің даму трендімен еш үйлеспеуі».

Соғысудың орнына біз халқымызды, әсіресе, жастарымызды саналы әрі өркениетті қоғам құруға үндеуіміз керек. Президент «Ең басты міндетіміз – аймақтар арасындағы алшақтықты азайту және орта тапты нығайту», ал мақсатымыздың бірі – Еуразиядағы жетекші IT хабқа айналу» деді.

Сөйтіп еліміздің қуатты суперкомпьютерді іске қосуға кіріскенін, бұдан бөлек Сrypto City деп аталатын жаңа пилоттық жобаны жүзеге асыру жоспарын айтты. Мұнда криптовалютаны азық-түлік сатып алуға, қызмет төлеміне және басқа да мақсаттарда пайдалануға жағдай жасалады.

...Биыл БҰҰ-ның 80 жылдығын еске салып, «80 жыл бұрын жасалған институционалды құрылым мен қазіргі заман арасында алшақтық көп... Миллиардтаған адамның тағдырына әсер ететін аса маңызды шешімдерді бірнеше елдің қабылдағаны дұрыс емес.

Сондықтан Қазақстан БҰҰ Қауіпсіздік Кеңесінің құрамын кеңейтіп, оған әлемнің әр өңірінен өкіл қосу туралы ұстанымды қолдайды» деді.

Дәл осы сөздерді Палестинаның БҰҰ тұрақты өкілі Рияд Мансұрдың БҰҰ қауіпсіздік кеңесінің осы аптадағы жиынында жылап жібергені дәлелдейді. Ол бейбіт адамдардың қасіретін сөзбен жеткізу мүмкін еместігін айтты. Бұл соғыстың басты құрбаны – балалар деді дипломат.

Газа секторы үйіндіге айналды, 54 мыңнан астам палестиндік ажал құшты. Ал аштықтан өлуге айналған адамдардың қасіретін көру рас, мүмкін емес...

Қ.Тоқаев биылғы форумның тақырыбы «Ақыл-ой қосу арқылы келешекті бағдарлау» екенін айтып, «Бұл – біздің үндеуіміз әрі қалтқысыз сеніміміз» деді.

Амангелді Сейітханның сараптамасы.