Жыл соңына дейін Атырау облысының Махамбет, Исатай және Мақат аудандарында 60 пәтерлік 3 үйдің құрылысы аяқталады, деп хабарлайды 24KZ. Үй кезегінде тұрғандармен қатар ауылға келген жас мамандар да баспаналы болады. Жергілікті билік өкілдерінің айтуынша, жаңадан тұрғын үй салып, құрылыс жүргізу үшін инфрақұрылымды жаңғырту маңызды. Себебі аудан орталықтарында кәріз жүйесі тозған.
Махамбет ауданына келген мәдениет қызметкері Ержан Асқарұлы таяуда пәтерлі болды. «Дипломмен ауылға» бағдарламасымен соңғы екі жылда ауданға 12 жас маман келіпті. Жергілікті билік олардың әлеуметтік жағдайын жасап, баспанамен қамтып жатыр. Біразы үйлі болса, қалғаны кезегін күтіп отыр.
Ержан Асқарұлы, жас маман:
- 2023 жылы режиссёр мамандығын алып, осы Махамбет ауданындағы «Өнерпаз» мәдениет үйіне келгенмін. «Дипломмен ауылға» бағдарламасымен үйлі болып жатырмын. Осы Махамбет ауданына 10 шақты маман келгенбіз. Оның ішінде дәрігерлер бар, мұғалімдер бар. Бәрі жас мамандар.
Мына 60 пәтерлі үш қабатты үй желтоқсан айында тапсырылады. 2 және 3 бөлмелі пәтерлер әлеуметтік жағынан аз қамтылған отбасыларға, пәтер кезегінде тұрғандарға және жас мамандарға беріледі.
Жігер Төлеуғалиев, аудандық құрылыс бөлімінің басшысы:
- Ол жұмыстардың ішінде ток, су газ кәріз желісінің құрылысы толық аяқталды. Енді қазір ауланы абаттандыру, ойын алаңдарын орнату қалған. Жалпы болашақта осы жерде тағы да 3 тұрғын үйдің құрылысын салуға мүмкіндік бар.
Мүмкіндік бар дегенмен, біраз ауылда коммуналдық проблема болып тұр. Орталық кәріз жүйесінің тозығы жеткен немесе бұрыннан болмаған. Сол себепті аудан орталықтарында жаңадан кәріз жүйесін тарту мәселесі қаралып жатыр. Жобаны облыстық басқарма жүзеге асырады.
Күлән Құлбаева, облыстық Құрылыс басқармасының бөлім басшысы:
- Махамбет ауданында кәріз тазарту және кәріз жүйесінің жобалық-сметалық құжаттамасы жасалып жатыр. Сонымен қатар Құрманғазы ауданында кәріз жүйесінің ЖСҚ жасақталып жатыр. Алдағы 2026 жылдың бірінші тоқсанында ол жұмыстар аяқталып, құрылыс жұмыстары басталады.
Бүгінде облыстың 5 ауданында көп қабатты 8 үйдің құрылысы жүріп жатыр. 2027 жылға қарай 60 пәтерлік тағы 10 үй салу жоспарланып отыр. Енді ауданның орталығында орталықтандырылған кәріз жүйесі іске қосылса, баспана мәселесі толықтай шешіледі.
Авторлары: Арыстанбек Кенже, Айбек Байзақов, Жандос Рахметуллин
