Онлайн-бюджеттік мониторинг 132 млрд теңгеге тәуекелді төлемдерді анықтады.
Тиімді пайдаланылмаған мемлекеттік қаражаттың бір бөлігі бюджетке қайтарылды. Бұл туралы Орталық коммуникациялар қызметінде өткен брифингте қаржы вице-министрі Әсет Тұрысов мәлімдеді. Оның айтуынша, «Жүйе олқылықтарды бюджетке залал келтірмей тұрып анықтайды». Биыл мониторинг аясын кеңейту жоспарланған. Онлайн-бюджеттік бақылауға денсаулық сақтау, мәдениет, туризм және спорт салалары қосылады. Жүйе бюджет қаражатының мақсатты жұмсалуын нақты уақыт режимінде бақылайды. Жалпы Қаржы министрлігі бюджетті жоспарлаудан бастап, салық және кедендік әкімшілендіруге дейін толық цифрландыруды жүргізіп жатыр.
Дияс Крамшеев, «Электрондық қаржы орталығы» АҚ басқарма төрағасы:
- Мемлекеттік сатып алудың 5 түрі бар. Соның 2-3 толық автоматтандырылған. Мысалы, рейтингтік баллдық система. Онда біз 25 ақпараттық жүйемен интеграция жасау арқылы адам факторын толық алып тастадық. Егер сатып алуға қатысқан жағдайда, ақпараттық жүйе сіздің мәліметтеріңіздің барлығын ақпараттық жүйелерден алып, салыстырып шешім шығарады.
