Ақмолалық диқандар 7 миллион тонна астық жинады.

Бұрын-соңды мұндай көлемде өнім қамбаға құйылмаған. Дегенмен, бұл меже әлі де артатыны анық. Себебі орақ науқаны әлі жалғасып жатыр. Қазір егіс алқабының 95 пайызы орылды. Ауа райы осылай ашық болса, күзгі жиын-терім ай соңына дейін толық аяқталады.

Алты ай жазғы еңбегін ысырап етпей қамбаға құйып алған шаруалардың бірі Ғалымжан Әріпов. Ол 10 мың гектар алқапқа дән сепкен. Содан 18 мың тонна өнім алған. Астықтың орташа өнімділігі гектарына 20 центнер болды.

Ғалымжан Әріпов, шаруа:

- Өнімнің алғашқы легін көңілге қонымды бағада 90 мың теңгеден сатып үлгердік. Майлы дақылдарға да сұраныс жоғары. Қазір жергілікті май өңдеу зауыттарына жіберіп жатырмыз. Жалпы биылғы науқанға өкпе жоқ.

Орылған астықтың бір бөлігі қамбада кептіріліп, тазаланып жатыр. Осылайша келер жылға тұқым қоры сұрыпталады.

Абзал Азаматұлы, тілші:

- Бұрын астық бірнеше рет ескі тәсілмен тазаланатын. Мұндай әдіс көп уақыт пен күшті қажет ететін. Ал қазір заманауи технологиялар дәнді дақылды аз уақыт ішінде жоғары сапада сұрыптауға мүмкіндік беріп отыр.

Қамбадағы күні-түні созылатын қарбаласта механизаторлардың да еңбегі орасан. Олар тек көктемгі және күзгі дала жұмыстарында емес, жыл бойы да жұмыс істейді.

Нұржан Сәрсенбаев, механизатор:

- Мен 2000 жылдан бастап механизатор болып істеп келемін. Әр жылдары өнім әртүрлі болады. Биылғы астықтың шығымы қуантып отыр. Қазір егін орағын аяқтап, элеваторда кептіру, сұрыптау жұмыстарын жүргізіп жатырмыз.

Жыл сайын өңірде астық көлемі ұлғайып келеді. Бұл диқандардың тынымсыз еңбегі мен мемлекеттік қолдаудың нәтижесі. Биыл жергілікті шаруаларға 243 млрд теңге бөлінді.

Нұрбек Бадырақов, ауыл шаруашылығы басқармасының басшысы:

- Оның ішінде 118 миллиард теңгесі бұл 5 пайызбен «Кен дала — 2» бағдарламасы аясында берілген қаражат. Қазіргі таңда шаруалар алғашқы сол қаражатты қайтаруды бастап кетті. Одан бөлек, 54 миллиард теңгеге 5 пайызбен ауыл шаруашылық техникаларын лизингке алды. Жалпы 1500-ден астам техника сатып алынды. Бұл өз кезегінде облыстағы техниканы жаңарту үлесін 6 пайызға жеткізді.

Өңірде сыйымдылығы 4,3 млн тонна болатын 66 элеватор бар. Жалпы биыл облыс бойынша 5 жарым млн гектардан астам алқапқа дән себілді. Диқандар ауа райы осылай тұрақты болса, қамбаға 7 жарым миллион астық құюды көздеп отыр.

Абзал Азаматұлы, Виктор Полянный