Биыл мемлекет есебінен екі мыңға жуық бала тегін білім алады. Қазір еңбек нарығында механизатор, дәнекерлеуші, аспаз бен ветеринарлар жетіспейді.

Владислав Малышкин әке жолын қуып, құрылысшы мамандығына оқуға түсті. 3 курс студенті жаз бойы жергілікті кәсіпорында өндірістік тәжірибеден өтіп, өзін жақсы қырынан танытты. Диплом алған соң, бірден жұмысқа тұрды.

Владислав Малышкин, студент:

- Бұл мамандық маған болашағымен ұнайды. Өйткені қазір қаламызда салынып жатқан үйлер өте көп. Сондықтан құрылысшылар қашанда сұранысқа ие болады. Өкінішке қарай, оған екінің-бірі бара бермейді.

Өңірде ауыл шаруашылығы саласында механизатор, ветеринар тапшы. Қазір осы салаға кадр даярлайтын тоғыз колледж бар. Солардың бірінде Александр Корпенко білім алады. Ол — болашақ мал дәрігері.

Александр Корпенко, студент:

- Мен ауылда өстім. Кішкентай кезімнен атамның жанында жүріп, мал шаруашылығына деген қызығушылығым оянды. Сондықтан мектеп бітірген соң, осы мамандыққа оқуға түстім.

Биыл облыс бойынша жұмысшы мамандықтарына екі мыңға жуық оқу гранты бөлінді. Кәсіптік және техникалық білім беру колледждері жаңа құрал-жабдықтармен қамтылған. Бұл жас кадрлардың бәсекеге қабілетті болуына ықпал етеді.

Бауыржан Зейнуллин, Білім басқармасы бөлімінің басшысы:

- «Жас маман» бағдарламасы бойынша колледждерге жаңа комбайндар мен тұқым сепкіш техникалары сатып алынды. Сонымен қатар мал сою орындары мен сүт фабрикалары жабдықталды. Бұл студенттердің оқу барысында мол тәжірбие жинақтауына септігін тигізеді.

Өңірде дуалды білім беру жүйесі аясында үш мыңға жуық студент білім алады. Олар оқып жатқан мамандығы бойынша жұмыс істеп, мол тәжірбие жинақтап жатыр.

Авторлары: Айдарбек Айтмұхамбетұлы, Қуаныш Қазбеков