Қарағандыда жастар ресурстық орталығы жанынан нашақорлықтың алдын алу жөніндегі фронт-офис ашылды, деп хабарлайды 24kz.
Бұл еліміз бойынша іске қосылған үшінші кеңсе. Нысанның ашылу салтанатына орай ұйымдастырылған семинарға Қазақстан халқы Ассамблеясының республикалық Аналар кеңесінің өкілдері қатысты. Бұл ұйым «Салауатты сана» қоғамдық жобасы аясында нашақорлықпен күресуге атсалысады. Қарағандыда өткен семинарда профилактикалық жұмыс сапасын арттыру қажеттігі баса айтылды.
Фронт-офис жұмысы жастарды есірткінің зиянды әсерінен қорғауға және салауатты өмір салтын қалыптастыруға бағытталады. Жас буын өкілдерін білім мен мәдениетке баулып, түрлі әлеуметтік бастамаға, қайырымдылық шараларына біріктіреді.
Нәзипа Шанаи, ҚХА республикалық Аналар кеңесінің төрайымы:
- Бүгін Қарағандыда ашылып жатқан фронт-офис негізі қажет. Себебі бүгінгі бала өзімен жасты адамның айтқанын тезірек ұғады. Үлкен кісінің айтқанын жалпы ақыл айту деп түсінуі мүмкін. Сондықтан жастардың әлеуметтік мәселені өз қолына алып жатқаны қуанышты хабар.
Аналар кеңесінің мүшелері ІІМ Бәрімбек Бейсенов атындағы Қарағанды академиясында және медицина университетінде болып, маман даярлау жұмысымен танысты. Сондай-ақ полиция департаментінің фронт-офисында болды. Жыл басынан бері өңірде есірткіге қатысты 181 дерек тіркелген. 103 іс бойынша қылмыстық іс қозғалып, 51 адам жазаға тартылды. Олардың 6-ауы кәмелетке толмаған балалар.
Ермағанбет Бөлекпаев, облыс әкімі:
- Қазір Қарағандыда заманауи футбол академиясы салынып жатыр. Шахмат үйірмелері дамытылуда. «Оқитын ұлт», «Тұлпар мініп ту алған» зияткерлік білім жобалары жүзеге асырылды. Жастарды жұмыспен қамту үшін арнайы гранттар беріледі, жыл сайын «Жасыл ел» еңбек жасағына тартылады. Мұның барлығы жас буынды салауатты өмір салтына бағыттайды.
Жиын қорытындысы бойынша облыс әкімі мемлекеттік органдарға бір ай мерзім ішінде бірлесе отырып, нашақорлықты алдын алу жөніндегі жол картасын әзірлеуді тапсырды.
Авторлары: Руслан Нұрланұлы, Сайлау Игіліков, Аман Хамит
