Арнайы құрылған оқу орталығында азаматтық авиация академиясының студенттері тәжірибеден өтіп жүр. Жас курсанттар тікұшақты таулы жерлерде басқаруды үйренеді. Айта кетейік, ұшқыштар ұстаханасы саналатын Шығыс Қазақстан азаматтық авиациясына биыл 90 жыл толды. Осы уақыт аралығында кәсіби ұшқыштардың бірнеше буыны қалыптасты. Білікті инженерлер мен бортсеріктерді даярлау ісі қазір де үзілген жоқ. Себебі салада кадр тапшы.

Еліміздің азаматтық авиация саласына жыл сайын кемінде 600 маман қажет. Сондықтан, білікті маман даярлау ісі -уақыт талабы. Президент тапсырмасымен Катонқарағай және Зайсанда әуежай құрылысының басталғанын ескерсек, мамандарға тағы да сұраныс өседі. Халықаралық рейстер қабылдайтын нысандарға қажетті кадр даярлау ісі қазірден қолға алынды. Тәлімгер Владимир Ларионов жастарға білгенін үйретіп жүр. Тәжірибелі маман МИ-2 тікұшағымен 15 мың сағат ұшқан, реактивті ұшақты да басқарған.

Владимир Ларионов, тәлімгер-нұсқаушы:

- Жас курсанттарға тәлім берген алғашқы күннен бастап олардың жігерін жанып, авиацияға деген құлшынысын арттыруды өзіме міндет санадым. Себебі бүгінгі жастар уақыт өте келе өздері де кейінгі буынға тәлімгер болады.

Оқу алаңында әуе кемесінің құрылымы таныстырылып, ұшу алдындағы дайындықтың барлық деңгейі үйретіледі. Болашақ ұшқыштар МИ-2 және МИ-8 тікұшақтарында жаттығады.

Денис Грунский, ұшқыш:

- Біздің өңірде біраз уақыт ұшқыштарды оқыту тоқтап қалғаны белгілі. Соның салдарынан мамандардың жас айырмашылығында алшақтық пайда болды. Тәжірибелі мамандардың көбі қартайды. Олардың орнын басатын жастарды тәрбиелеп шығуымыз керек.

Өскеменде Азаматтық авиация академиясының студенттерін даярлау топтарынан бөлек жергілікті колледжде әуежайлар мен әуе кемелеріне қызмет көрсететін мамандықтар ашылды. Қазір жер-жерден жас курстанттар келіп, ұшу тәжірибесінен өтуде.

Нұрлан Сапарғали, Азаматтық авиация академиясының курсанты:

– Біздің енді бірінші ұшуымыз бұл. Өскемен қаласына түстік. Бірінші вертолетіміз – МИ-2. Болашақта МИ-8 және еуропалық вертолетпен ұшқым келеді.

Ұшқыш болу оңай емес. Болашақ мамандарды жетелеп келген күш көк аспанға деген сүйіспеншілік. Олар қызметтің қиындығы мен жауапкершілігін біледі. Ұзақ және қауіпті сапарлар да болуы мүмкін. Теория мен тәжірибеден олар психологиялық дайындықтан өтеді.

Авторлары: Елдос Кәкенов, Вячеслав Ветлугин және Дмитрий Пыхтин