Атырау облысында зоотехник пен агроном тапшы. Ауыл шаруашылығы саласына 30-ға жуық маман керек. Қазір іс басында жүргендердің орта жасы 60-тан асқан. Сондықтан шаруашылықтарға жастарды тарту жұмыстары жүріп жатыр.
Жеңілдетілген несиемен баспана берілсе, «Дипломмен ауылға» бағдарламасымен бірреттік жәрдемақы төленеді.
Шаруашылықтан тұтынушыға дейін жететін ет пен балық өнімдерінің сапасын ветеринариялық инспекция мамандары қадағалайды. Мал сою бекеттерінің тазалығын да тексеріп отырады. Астан ауру тарамас үшін, санитарлық талапты сақтау маңызды. Өңірдегі Құрманғазы ауданының негізгі кәсібі – балық пен мал шаруашылығы. Ауданда 650-ден астам шаруашылық бар.
Асылбек Ешекеев, ветеринар:
- Біздің міндетіміз – бақылау және қадағалау жұмыстарын жүргізу. Мына келген малды қабылдап, оның ветеринарлық анықтамасы болуы керегін және союға дейінгі, союдан кейінгі техникалық бақылау жүргізіп, Дәрігер осы жерден 2-ші үлгідегі анықтама рәсімдеп, сол рәсімделгеннен кейін базарларға, яғни ет дүкендеріне жөнелтіледі.
Аудан орталығында ет өнімдерін дайындайтын екі цехта күз-қыс айларында күніне 30-40 мал сойылады. Өнімнің ветеринарлық талапқа сай дайындалуына алдымен мал сою бекетінің иесі жауапты.
Өтежан Дайынов, мал сою цехының басшысы:
- Осындай жұмысты бастағаннан кейін көп нәрсені түсіндірді. Ветеринарлық талаптарға сәйкес жұмыстар жүргізіліп жатыр. Халыққа осы ет тағамын жеткізіп беруде ерекше қолқабыс етеді. Бізде ет кешені бар, осы арада мал сойылып, етін базарға, жекеге жеткізіліп тұрамын.
Ресеймен шекаралас аймақтағы аудан биыл 9 мың тоннаға жуық балық өнімдерін экспорттады. Инспекция шетелге шығарылатын тауардың сапасын тексеріп, арнайы сертификат береді. Экспорттың әлеуеті артып, кәсіп бастағандардың қатары көбейгенімен, салада маман тапшылығы өзекті болып тұр. Инспекцияда зейнет жасына жақындаған жандар жұмыс істеп жүр. «Жастардың келгісі жоқ», — дейді жауаптылар.
Абат Жанғалиев, Құрманғазы ауданының әкімі:
- Күні бүгінде бізде ветеринария саласының мамандары тапшы. Ауданымызға келген ветеринария мамандарына «Дипломмен ауылға» бағдарламасымен берілетін қаржылай көмектердің барлығы көрсетіліп жатыр. Сонымен қоса де кейбір алыс елді мекендерге баратын ветеринраия мамандарына қызметтік пәтер және үй алуға «Отбасы» банкіден жеңілдетілген несие беріледі.
Бүгінде аудандағы 19 ауылдық округтегі ветеринария бөлімшелері толықтай автокөлік, басқа да материалдық қажеттілікпен қамтылған. Ендігі міндет – кадр тапшылығын жою. Осы орайда, жергілікті билік ауыл шаруашылығы мамандарын дайындайтын жоғарғы оқу орындарына 30-ға жуық маманға тапсырыс берген. Жалпы биыл өңірге жеті ветеринар мен агроном келді.
Авторлары: Арыстанбек Кенже, Айбек Байзақов, Жандос Рахметуллин
