Астанада VIII Әлемдік және дәстүрлі діндер лидерлерінің съезі аясында алғаш рет БҰҰ Өркениеттер альянсының қамқорлығымен діни нысандарды қорғауға арналған арнайы сессия ұйымдастырылды, деп жазады Egemen .kz.
Бұл іс-шараны БҰҰ Бас хатшысының орынбасары, Өркениеттер альянсының Жоғарғы өкілі Мигель Анхель Моратинос өткізді. Сессияға жетекші діни қайраткерлер, дипломаттар, халықаралық ұйымдар мен мемлекеттік құрылымдардың өкілдері қатысты.
Кездесуде діни нысандарды қорғау, ғибадат орындарының қауіпсіздігін қамтамасыз ету және діни төзімділікті нығайту мәселелері талқыланды. Қатысушылар соңғы жылдары әлемнің түрлі өңірлерінде діни нысандарға жасалып жатқан вандализм әрекеттері мен зорлық-зомбылық жағдайларына алаңдаушылық білдірді. Халықаралық қауымдастық тарапынан жедел әрі келісілген жауап беру қажеттігі айтылды.
Сессия барысында БҰҰ-ның діни нысандарды қорғау жөніндегі іс-қимыл жоспарының жүзеге асырылуы негізгі тақырыптардың бірі болды. Құжатта ғибадат орындарының қауіпсіздігін арттыруға, құқықтық тетіктерді күшейтуге және сенушілерді қорғауға бағытталған нақты шаралар қамтылған.
Бұл басқосу еліміздің халықаралық аренадағы жоғары беделін тағы бір мәрте айқындады. Әлемдік және дәстүрлі діндер лидерлерінің съезі жаһандық рухани дипломатияның мойындалған алаңы екенін дәлелдеді.
Астанада арнайы сессияның өткізілуі – еліміздің бейбітшілік, толеранттылық және өзара құрмет қағидаттарына берік екенінің көрінісі. Қазақстанның бастамалары бүгінде бейбітшілік пен өзара түсіністікті ілгерілетудің үлгісі ретінде бағаланып отыр.
