Араб жұртын да инфляция алаңдата бастады. Шығанақ елдерінде ет өнімдеріне сұраныс артып, кейде тіпті тапшы болып жатыр. Әсіресе қой және құс еті сауда сөрелерінде көп тұрақтамайды. Осының әсерінен бағада ауытқу бар. Сосын жылдық инфляция 3 пайызға жуықтады.
Жылына миллиондап турист қабылдайтын араб әмірліктері азық-түлік қауіпсіздігіне баса мән береді. Тұтынушылар сұранысы мұнда көбіне импортпен өтеледі. Жергілікті өнім өндірісі аз. Азық-түліктің 90 пайызға жуығы сырттан жеткізіледі. Тасымал бір сәтке тежелсе, ахуал қиын. Десе де нарық мұндай мәселемен әлі бетпе-бет кезіккен емес. Ал баға жағынан айырмашылық жер мен көктей. Таяу Шығыс төңірегіндегі ірі қаржылық орталықта қызмет құны аспандап тұр.
Жергілікті сауда сөрелерінде тұрған ең құнды табиғи тағам — ет және сүт өнімдері. Тұтынушылар түр-түрін таңдай алады. Тек қалта қалың болуы керек. Ал табысы орта деңгейдегі азаматтарға келісі 6 мыңнан басталып, 15 мың теңгеге дейін баратын сиыр және қой еті күнделікті тұтынатын азық қатарынан шығып қалған.
Дей тұрғанмен араб мемлекеттерінің кейбірі әзірге тығырықтан шығар жол тауып отыр. Мәселен, әмірлік өз азаматтары үшін сырттан жеткізілетін ет өнімдеріне біраз субсидия бөледі. Сұранысы әдетте Рамазан, Құрбан айт кезінде жоғарылайды. Баға сол уақытта шарықтай түседі. «Horeca» желілеріне келсек, ондағы жағдай басқаша. Туристік қала болған соң адам аяғы арылмайтын орындарға ет үздіксіз жеткізіледі. Қазақстаннан бұл өнімді тұрақты түрде импорттайтын кәсіпкер агросаладағы әлеуетіміздің ауқымды екенін айтып, бірлесе жұмыс істеу жолдарын атады.
Халид Әлвалид, кәсіпкер:
- Қазір біз жұмыс істейтін қазақстандық серіктесіміз тасымалды тұрақты түрде жасайды. Аптасына 5 рет жаңа сойылған қой еті жеткізіледі. Туристік маусым кезінде осындай жағдай. Анығында бұдан да көп әкелуге болады. Егер сенімді тұтынушы табылса, бірлесіп жұмыс істейміз деген ойдамын.
Айта кетейік, былтырғы 10 айда Қазақстаннан әмірлікке 13,3 мың тонна ет экспортталды. Отандық кәсіпкерлер бұл істен 45 млн доллар пайда тапты. Ал елдегі азық-түлік инфляциясына келсек, көрсеткіш кейінгі 1 жылда 3 шамасында тіркелді. Бұған көбіне ет және сүт өнімдерінің қымбаттауы әсер еткен.
Авторы: Рауан Мыңбай
