Бұл ақпаратты Ұлттық статистика бюросы таратты.


Ет пен ет өнімдерін тұтынудың ең жоғары деңгейі Алматы қаласында, сондай-ақ, Жетісу, Қарағанды және Ақмола облыстарында тіркеліп отыр, деп жазады inbusiness.kz сайты.

Аталған өңірлерде бір адамға шаққандағы орташа тұтыну көлемі тоқсанына шамамен 24 келі. Ал ең төмен көрсеткіш Шымкент қаласында тіркеліп, бір адамға шаққанда тоқсанына 16,1 келі болды.

Өңірлер бөлінісінде жекелеген азық-түлік түрлерін тұтыну деңгейі әртүрлі:

  1. Нан өнімдері мен жарма бұйымдарын ең көп тұтынатын өңір – Түркістан облысы, мұнда бір адамға тоқсанына 43,4 келіден келеді.
  2. Балық өнімдерін ең көп тұтыну Солтүстік Қазақстан облысында байқалады. Аталған көрсеткіш 5,8 келіні құрады.
  3. Сүт және сүт өнімдерін тұтыну көлемі Ақмола облысында жоғары – бір адамға тоқсанына 83,1 келіден келеді екен.
  4. Көкөністер мен жемістерді ең көп тұтынатын өңір – Алматы қаласы, тиісінше 30,76 келі және 36,9 келі.

Жалпы алғанда, 2025 жылдың III тоқсанында жан басына шаққандағы азық-түлік өнімдерін орташа тұтыну көлемі келесідей:

  • Картоп – 11,3 келі;
  • Нан өнімдері мен жарма бұйымдары – 31,7 келі;
  • Ет және ет өнімдері – 21,2 келі;
  • Жемістер – 29,6 келі;
  • Қант, тосап, шоколад және кондитерлік өнімдер – 11,4 келі;
  • Сүт өнімдері – 60,5 келі;
  • Жұмыртқа – 53,9 дана;
  • Балық пен теңіз өнімдері – 3,6 келі.