Әлем бойынша 50 жасқа дейінгі адамдар арасында қатерлі ісікке шалдығу көрсеткіші өсіп келеді. Кейінгі 30 жылда мұндай жағдайлар 79 пайызға артты. Бұл туралы BMJ Oncology журналының зерттеуінде айтылды. 1990 жылдан бері жасы елуге жетпей обырдан көз жұмғандар қатары 28 пайызға артқан. Зерттеу 204 елде жүргізілген.
50 жасқа дейінгі науқастар арасында ең жиі кездесетін қатерлі ісік түрі – сүт безі обыры. Сонымен қатар, кеңірдек, қуық асты безі және асқазан обыры да жиілеп барады. Дәрігерлер ауруға негізінен зиянды тамақ, темекі мен алкоголь, артық салмақ пен қозғалыссыз өмір себеп болады деп отыр. Зерттеушілер аурудың алдын алу үшін уақытылы скринингтен өтуді ұсынады.
Юрий Ранков, Тель-Авивтегі бірінші медициналық орталықтың директоры:
- Біз жас әйелдер арасында сүт безі қатерлі ісігінің анықталып жатқанын жиі көретін болдық. Бұрын бұл дерт негізінен 50 жастан асқандарға тән болса, қазір науқастардың жасы айтарлықтай жасарған. 40-тың шамасындағы, тіпті 30-дағы әйелдер сырқатпен келіп жатыр. Мәселенің бүгінгі ауқымы алаңдатады.
