Жапонияның премьер-министрі Шигеру Ишиба Қазақстанға ресми сапармен келеді. Бұл туралы Мемлекет басшысы Қасым-Жомарт Тоқаев мәлімдеді.
Бүгін Президент күншығыс елінің Сыртқы істер министрін қабылдады. Алдымен тараптар сауда-экономика, инвестиция һәм көлік-транзит сынды бағыттағы байланыстарды бағамдады. Кейін халықаралық құрылымдар аясындағы ықпалдастық жөнінде пікір алмасты. Қасым-Жомарт Тоқаев Жапонияны Азиядағы сенімді әрі жақын серіктесіміз деп атап, Токиомен жан-жақты ынтымақтастықты нығайтуға ерекше мән бертінін жеткізді. Өз кезегінде Такеши Ивая қонақжайлық танытқаны үшін ризашылығын білдіріп, екі елді мүдделі серіктестер деді. Әрі бұл сапар байланысты бекіте түсетініне сенім білдірді.
Қасым-Жомарт Тоқаев, Қазақстан Республикасының Президенті:
- Ең алдымен премьер-министр Ишибаға ыстық ықыласымды жеткізуді сұраймын. Жоспарымыз бойынша премьер-министр Шигеру Ишиба Қазақстанға ресми сапармен келмекші. Біз оның сапарын асыға күтіп, дайындалудамыз. Өзара қарым-қатынасымыз жоғары қарқынмен дамып келе жатыр деп сеніммен айтуға болады.
