«Селтик» Қазақстанға келді. Ертең футболдан УЕФА Чемпиондар Лигасы аясында маңызды матч болады.
Алматылық «Қайрат» өз алаңында глазголық «Селтикті» қабылдайды. Бұл қос команда арасындағы қарымта кездесу. Шотландияда өткен алғашқы ойын 0:0 есбемен аяқталған болатын. Жеңіске жеткен тарап Чемпиондар Лигасының топтық кезеңіне жолдама алады.
Жалпы есепте үшінші орындамыз. Шымкент қаласында спорттық ату түрлерінен Азия чемпионаты жалғасып жатыр. Қазақстандық қыз-жігіттер бүгінге дейін 30 медаль жеңіп алды. Оның 8-і алтын. Әсіресе жекелей сындарда 5 мәрте көк туымыз көтеріліп, әнұранымыз шырқалды. Ал қалған 3 алтынды командалық сындарда жеңіп алдық. Атап айтқанда, Ислам Сәтпаев, Артём Сидельников, Эдуард Ещенко, Анастасия Молчанова, Әдель Садақбаева, Ольга Хайлова, Сәуле Әлімбек сияқты спортшыларымыз жақсы өнер көрсетуде. Жалпы командалық есепте екінші орында Қытай құрамасы, бірінші орында Үндістан құрамасы тұр. Айта кету керек, биылғы Азия чемпионатына 27 елден 800-ге жуық қатысушы жиналды. Олар екі негізгі бағыт бойынша, яғни, ашық аспан астында стенд ату және жабық спорт кешенінде оқпен ату бәсекелері бойынша өзара мықтыны анықтайды. Ал сарапқа салынатын медальдар саны – 700. Шымкент қаласындағы құрлықтық дода 30-тамызға дейін жалғасады.
А. Қожаназаров: көкпарға клубтық жүйе енгіземіз
Көкпарға клубтық жүйе енгізіледі. Бұл жөнінде Қазақстан көкпар федерациясының президенті Айдарбек Қожаназаров мәлімдеді. Күні кеше Алматы облысында ұлттық спортымыздан жасөспірімдер арасындағы ел чемпионаты өтті. Оған 14 команда жиналып, бір апта бойы өзара мықтыны анықтады. Нәтижесінде финалда Түркістан және Жамбыл құрамалары кездесіп, негізгі ойын уақыты 7:7 есебімен аяқталды. Ал қосымша уақытта Түркістан сапындағы Айтуған Ерболат «алтын салым» авторы атанып, өз командасына жеңіс сыйлады. Матчтан кейін жас көкпарпшылармен кездескен Айдарбек Қожаназаров ішкі біріншіліктің форматы өзгертенін алға тартты. Өйткені кей өңірлерде 1 емес, 4-5 мықты команда бар. Оларға да мүмкіндік беріп, бәсекелестікті күшейту керек дейді федерация президенті. Осы мақсатта алдағы жылдан бастап бірқатар жаңашылдық енгізу жоспарланып отыр.
Айдарбек Қожаназаров, Қазақстан көкпар федерациясының президенті:
- Көкпарға клубтық жүйе енгіземіз. Өйткені қазір республикалық жарыстарға бір облыстан бір ғана команда ғана қатысады. Ал клубтық жүйеде бірнеше команда бақ сынай алады. Бұл қабілетті жігіттер мен талантты жастардың тасада қалмауына көмектеседі. Яғни барлығына бірдей мүмкіндік бергіміз келеді. Осы арқылы ішкі бәсекелестікті күшейтіп, ұлттық спортымыздың дамуына тың серпін бергіміз келеді.
Бокстан әлем чемпионатына дайындық
Қазақ жігіттері тас-түйін дайын. Тура он күннен кейін Англияның Ливерпуль қаласында бокстан жылдың басты бәсекесі әлем чемпитонаты басталады. Қайрат Сәтжанов баптайтын ұлттық құрама өкілдері қазір Алматы облысында жаттығу жиынын өткізіп жатыр. Оған нөмірі бірінші, екінші, үшінші және төртінші нөмірлі жігіттер түгел жиналды. Күні кеше Қазақстан бокс федерациясының президенті Шахмұрат Мүтәліп пен құрметті президенті Роман Төреханов жаттығу процесіне арнайы барып, барысын өз көздерімен көріп қайтты. Жігіттермен кездесу өткізіп, ел сенімін жеткізді. Айта кетейік, алдағы әлем чемпионатына Санжар Тәшкенбай, Махмұд Сабырхан, Бибарыс Жексен, Ертуған Зейнуллинов, Төрехан Сабырхан, Сабыржан Аққалықов, Нұрбек Оралбай, Бекзат Нұрдәулетов, Сағындық Тоғамбай және Айбек Оралбай қатысады. Ел намысын қорғайтын жігіттер ертең, яғни 26 тамыз күні жолға шығады. Олар алдымен Англияның Шеффилд қаласына аттанып, сол жерде бірлескен жаттығуға қатысады. Ал Ливерпуль қаласындағы әлем чемпионатының өзі 4-14 қыркүйек аралығында өтеді.
