Қазақстандық актриса, продюсер Айнұр Ілиясова әлеуметтік желілерде жазба жариялап, Алматыдағы А.Н. Сызғанов атындағы Ұлттық ғылыми хирургия орталығының анестезиологына шағымданды. Оның айтуынша, дәрігер отадан кейін одан ақша талап еткен, — деп хабарлайды Massaget.kz тілшісі.
Мән-жайы
Айнұр Ілиясованың айтуынша, жақында анасына осы орталықта ота жасалған. Ота алдында әйелден жақын туысының байланыс нөмірін қалдыруды сұраған. Алайда жазба авторының айтуынша, анестезиолог ол нөмірді жеке пайдасына сұраған.
"Ол маған жазып, ақша талап етті. Мен клиника директорына шағымданып, мәселені қарауды өтіндім. Бірақ мұндай әрекеттерді тоқтатудың орнына, отадан шыққан анама сол анестезиолог келіп, "қызын тыныштандыруды" талап еткен. Бұл жай ғана кәсіби этиканы бұзу емес. Бұл — ауыр хәлде жатқан науқасқа қысым көрсету", — деп жазды ол.
Сызғанов орталығы не дейді?
Сызғанов атындағы Ұлттық ғылыми хирургия орталығы Tengrinews.kz-ке пікір білдірген.
"Қазір осы шағым бойынша қызметтік тергеу жүргізіліп жатыр. Нәтижелері заңда белгіленген мерзімде өтініш иесіне ұсынылады", – деп жазылған орталық жауабында.
Өзекті жаңалықтарды өз уақытында оқу үшін Facebook парақшамызға жазылыңыз!