Мәжіліс депутаты Асхат Аймағамбетов кейінгі жылдары медицина қызметкерлеріне шабуыл жасалған 280 дерек тіркелгенін, десе де шынайы жағдай бұдан да нашар болуы мүмкін екенін айтты, — деп хабарлайды Massaget.kz тілшісі.
"Бас сүйегі сынған, миына қан құйылған"
Депутат бұған дейін Қостанайда болған оқиғаны еске салды.
"Тәжірибелі уролог науқастарды қабылдап жатыр. Аяқ астынан жанжал туындап, оған шабуыл жасалады. Салдары өте ауыр: дәрігердің бас сүйегі сынып, миына қан құйылып, ауыр жарақат алады. Ол 4 ай жұмыстан шығып қалады. Бір қарағанда, жалғыз адам зардап шеккендей көрінеді. Бірақ сандарға жүгінейік. Бұл маман ауырған 4 айдың ішінде 960 адамды емдер еді", — деді Аймағамбетов.
Асхат Аймағамбетовтің сөзінше, мыңға жуық қарапайым азамат осының кесірінен білікті көмек ала алмай қалды, біреудің дерті асқынды, біреуге уақытылы ота жасалмайды.
"Бір дәрігерді соққыға жығу деген — іс жүзінде мың қазақстандықты ем-домсыз қалдыру деген сөз", — деді ол.
Жедел жәрдемге қатысты жағдай
Депутат жедел жәрдем бригадасына қатысты жағдай тіпті ушығып тұрғанын айтты.
"Олар үйге кіреді. Агрессия басталады. Фельдшерді ғана емес, жүргізушіні де ұрады. Ал жедел жәрдем жүргізушісі деген кім? Әсіресе, әйел дәрігер болғанда, ол фельдшердің жалғыз қорғаушысы, көмекшісі, тіпті тасушысы рөлін де атқарады. Салдарынан орташа жарақат, жүргізуші мен фельдшер 15 күнге ауруханаға түседі. Осы екі аптада бұл бригада 120 шақыртуға баруы мүмкін еді", — деді ол.
Оның айтуынша, бұл — өмір мен өлім мәселесі.
"Бір бұзақының кесірінен жедел жәрдемнің бір бригадасы, бір көлігі істен шығып қалды. Сондықтан осы жәрдемнің науқастарға жету уақыты ұзарды. Ал инфаркт пен инсульт кезінде есеп сағатпен емес, минутпен өлшенетінін жақсы білеміз. Сондықтан бұл — өмір мен өлім мәселесі", — дейді ол.
Статистика қандай?
Денсаулық сақтау министрлігінің ресми деректері бойынша кейінгі бес жылда 280 шабуыл тіркелген.
"Бірақ ашығын айтайық, бұл айсбергтің ұшы ғана. Шынайы санды кемінде 10-ға көбейтуге болады. Медицина қызметкерлері шабуыл туралы көбіне арызданбайды, өйткені олардың қорғау табатынына сенімі жоқ, бұған қоса дәрігерлер жұмыстың орнына тергеумен жүруге уақыт жоғалтқысы келмейді", — деді депутат.
Қандай шешімдер қарастырылып отыр?
Депутаттың сөзінше, Қылмыстық кодекске жаңа 380-3-бапты енгізу көзделіп отыр. Ол "медицина қызметкері" және "жедел медициналық жәрдем жүргізушісі" деген арнайы субъектіні белгілейді.
"Біз жаңа ештеңе ойлап тауып отырған жоқпыз. Қылмыстық кодексті ашып қарасақ, бізде дәл осылай, ерекше мәртебемен ерекше қорғалатын бірқатар мамандық бар. ...Жақында ғана болған қайғылы жағдайды бәріміз білеміз. Нағыз батыр Ұлдана қызымыздың ерлігін еске алайықшы. Жәрдем көрсетуге келген фельдшер құтқарушыларды күтпей, өз өмірін қиып, адамдарды құтқарды. Олардың жұмысы міне осындай", — деді Аймағамбетов.
Еске салайық, бұған дейін осы заң жобасы Мәжіліске берілді.
Қызықты жаңалықтар мен видеоларды көру үшін TikTok арнамызға жазылыңыз!
