Таразда 108 көшеге асфальт жабыны төселіп жатыр.

Олардың басым көпшілігінде бұрын-соңды тас жол болмаған. Бұрын батпаққа батып шаршаған жұрт енді алғыс айтып жатыр. Жалпы кейінгі 3 жылда облыс орталығында 420 көше жөнделген.

Мырзабай Байболатов 30 жыл бұрын Қант зауыты алабына көшіп келген. Сол жылдары бұл аумақта бірнеше негізгі көшеде ғана асфальт болды, — дейді. Жұрт лай басқан топырақ жолмен біраз жыл жүрді. Әйтсе де соңғы 3 жылда тұрғын үй алабындағы 80 көше мен бұрылыстың 80 проценті жөнделді.

Мырзабай Байболатов, қала тұрғыны:

- Ой бұрын көше жаман еді. Машина да батпақ, аяғымыз да батпақ, үйге зорға жететінбіз. Қазір тап-таза. Қалада тұрғандай болып қалдық. Ешкім қарамайтын бұл жаққа. Мынау Казпоселокқа. Қазір оның іші де асфальт, мынау Сахарзавод та асфальт. Барлық жерде асфальт жасап жатыр.

Бұған дейін Тектұрмас тұрғын үй алабындағы бірде-бір көшеде тас жол болмаған. Биыл барлық көшесіне асфальт салынды. Жалпы Таразда жол саласына 4,3 миллиард теңге бөліп 26 жоба жүзеге асуда. Бұл дегеніміз биыл 108 көше мен бұрылыстары тақтайдай тегіс болады. Жауаптылар қала шетіндегі шағын аудандарға басымдық беріп отыр.

Дамир Айманов, қалалық ТҮКШ бөлімінің сектор меңгерушісі:

- 75 көшесі мүлдем асфальт көрмеген көшелер. Оның ішінде осы Тектұрмас алабы, Қызылабад, Сахзаводтағы біраз көшелер бар. Су жүргізіліп қойған сол көшелердің барлығыга асфальт төселді. Енді бірен саран су жүргізілмеген көшелер бар. Су жүргізіліп біткеннен кейін ол жақта да жоспарлаймыз асфальт салу жұмыстарын.

Облыс орталығында жолмен қоса бірнеше көпір салынып жатыр. Солардың бірі Ұлы дала шағын ауданында қолданысқа беріледі. Қапал каналының үстіндегі өткел көлік қозғалысын жандандырып, жаяу жүргішілер үшін де тиімді болып отыр.

Шарапат Сайлаубаева, қала тұрғыны:

- Мына көпірдің салынған пайдасы тұрғындарға бәріміздің қуанып жатқанымыз, мынау Киров базарына бару оңай болып қалды. Оған 15 минутта баруға болады. Бірақ бұрын айналма жолмен баратынбыз. Базардың аты базар арзандап аласың, қалағаныңша аласың. Ақшаңа қарап аласың мысалы. Сол үшін өте қуанып жатырмыз. Көпірдің салынғаны өте жақсы болды.

Бүгінде шаһар құрамына кірген 20 саяжайдағы 100 көшеге шағылтас төсеу жұмыстары жүріп жатыр. Жалпы биыл облыс бойынша жергілікті маңызы бар автожолдар мен елді мекен көшелерін жөндеуге 28 млрд теңге бөлінді.

Мерей Бает, Бақытжан Бапаев, Елдар Байділдә