Бүгін ҚР Мемлекеттік күзет қызметі айрықша мақсаттағы күштерінің әскери бөлімдерінде көктемгі шақырылым бойынша мерзімді әскери қызметке алынған сарбаздардың әскери ант қабылдау рәсімі өтті, деп хабарлайды El.kz ақпарат агенттігі.
«Айбын» президенттік полкі сарбаздары салтанатты ант қабылдау рәсімін Астана қаласындағы «Отан қорғаушылар» монументі жанындағы алаңда өткізді, бұл маңызды шараға жас сарбаздардың ата-аналары мен жақындары қатысты.
El.kz Артём ЧУРСИНОВ
Көктемгі шақырылым аясында ҚР МКҚ қатарын еліміздің барлық өңірлері мен республикалық маңызы бар қалаларынан іріктеліп алынған жас азаматтар толықтырды. Олар әскери бөлімдердің оқу-жаттығу орталықтарында арнайы даярлық курсынан өтіп, әскери тәртіп пен машықтарды меңгерді.
El.kz Артём ЧУРСИНОВ
ҚР Мемлекеттік күзет қызметі қатарында мерзімді әскери қызмет атқаруға 18 бен 27 жас аралығындағы, бойы 180–195 см аралығында, денсаулығы жақсы, орта немесе жоғары білімі бар азаматтар қабылданады. Спорттық жетістіктері бар, жоғары білімді үміткерлерге артықшылық беріледі.
El.kz Артём ЧУРСИНОВ
Мемлекеттік күзет қызметі бастығының орынбасары — айрықша мақсаттағы күштердің қолбасшысы генерал-майор Айтқұрман Омарбеков жас сарбаздарды құттықтап, олардың алдағы қызметіне сәттілік тіледі.
Бүгінгі салтанатты саптың мәні ерекше. Бүгін сіздер – Отан алдында қасиетті ант қабылдап, жауынгер атандыңыздар. Бұл – зор жауапкершілік пен биік абырой. Сіздер әскери істі меңгеріп, тәртіп пен табандылықты ту етіп, ел басшылары қатысатын маңызды іс-шараларда қызмет атқаратын боласыздар. Қауіпсіздік пен тәртіп – сіздердің басты міндеттеріңіз. Бұл – екінің біріне жүктелмейтін үлкен сенім, — деді.
Сондай-ақ генерал-майор Омарбеков өз сөзінде батыр бабалар рухын ұлықтап, олардың ерлік өнегесі жас сарбаздарға бағыт-бағдар болуы тиіс екенін ерекше атап өтті.
Халық қаһарманы, даңқты қолбасшы Бауыржан Момышұлы «Ерлік — елге мұра, ұрпаққа үлгі» деген. Сіздер де осы жолда тайсалмас табандылық, қайыспас қайсарлық танытып, берген антқа адал болуларыңыз қажет, — деді.
Салтанатты шарада жас сарбаздардың атынан сөз алған қатардағы жауынгер Әлхамжан Секеновтің әкесі Қуаныш Есімов жүрекжарды тілегін білдірді.
Сіздерді бүгінгі әскери ант қабылдау мерекесімен шын жүректен құттықтаймын. Бұл – Отан алдындағы қасиетті борышты өтеуге ресми серт беретін ерекше күн. Ұлан-ғайыр жеріміз бен тәуелсіздігімізді қорғау – әрбір азаматтың парызы. Бұл парызды тек әскери тәртіпті қатаң ұстанған, рухы биік сарбаз ғана орындай алады,- деді.
Әскери ант берген қатардағы жауынгер Бағдәулет Мырзаханов жаңа қызметтің маңызы мен жауапкершілігін тілге тиек етті.
Бүгінгі ант қабылдау рәсімінің сәті көзді ашып‑жұмғанша келді. Бізге көңіл бөліп, сапқа тұрғызуды үйреткен командирлерімізге алғысымыз шексіз. ҚР Мемлекеттік күзет қызметінің «Айбын» Президенттік полкінің сарбаздары атанғанымызға қуаныштымыз. Артылған сенімге селкеу түсірмейтінімізге кәміл сенімдімін, — деді сарбаз.
ҚР Мемлекеттік күзет қызметінің «Айбын» Президенттік полкі қатарын толықтырған қатардағы тағы бір жауынгер Абылайхан Қадырхан өзінің жүрекжарды ойымен бөлісті.
Бұл алғашқы әрі соңғы рет берілетін Отан алдындағы серт. Ант – бұл жай сөз емес, бұл біздің ар-намысымыз бен азаматтық борышымыздың символы, — деді.
Сарбаз бір ай ішінде алған алғашқы әскери дайындықтарымен де бөлісті.
El.kz Артём ЧУРСИНОВ
Қызметіміз басталғалы бір айға жуықтады. Үш апта бойы далалық оқу-жаттығу орталығында болып, атыс дайындығы, алғашқы медициналық көмек, тактикалық даярлық және әскери жарғылармен таныстық. Бүгінде біз өз борышымызды толық түсініп, оны адал атқаруға дайынбыз, — деді қатардағы жауынгер.
