Елімізде өңірлік ғылымды дамытуға бетбұрыс жасалады.
Бұл экономиканың нақты секторының әлеуетін арттырудың бірден-бір жолы. Қостанайда өткен көшпелі отырыста Қазақстан Республикасы Президенті жанындағы Ұлттық Ғылым академиясының Президенті Ақылбек Күрішбаев осылай деп мәлімдеді.
Азық-түлік, темір кенін өндіру, автомобиль жасау бойынша Қостанай облысы елімізде көш бастап тұр. Алайда заманауи технологияларды игеріп, шикізатты терең өңдеу ісінде қарқын баяу. Ақылбек Күрішбаевтың айтуынша, ол үшін бірінші кезекте өңірлік ғылымның әлеуетін арттыру маңызды. Бюджеттен бөлінетін қаржының басым бөлігін Астана мен Алматыда қалдыра бермей, облыстарда ғылыми-зерттеу жұмыстарын жандандыруға бағыттау қажет.
Ақылбек Күрішбаев, ҚР Президентінің жанындағы ҰҒА президенті:
- Бұрын әкімдіктер ғылымға ақша бөлмеген. Қазір бюджеттік кодекске өзгеріс жасап, қазір әрбір әкімдік конкурс өткізіп, содан кейін ғылымға қаражат бөлетін болды. Бұл үлкен жаңалық. Екінші жаңалық әрбір әкімдіктің жанында қазір арнайы ғылым кеңесі құрылып жатыр. Сол ғылым кеңесі бүкіл өңірдегі жұмыстың бәрін басқаратын болады.
Жиын барысында отандық, шетелдік ғалымдар, атқарушы билік, бизнес өкілдері облыстың кешенді дамуының басым бағыттарын талқылады.
Құмар Ақсақалов, облыс әкімі:
- Мемлекет басшысының «Қуатты өңір-Қуатты ел» ұстанымына сәйкес, жұмыс істеуіміз қажет екендігі атап өтілді. Сондықтан одан әрі даму үшін негізгі 4 стратегиялық бағыт айқындалды. Бірінші ол көлік, логистика инфрақұрылым, қара металлургия және агроөнеркәсіп кешені. Осы негізгі төрт бағыт бойынша біз жұмыс істеп жатырмыз.
Сондай-ақ Қостанайдағы Ахмет Байтұрсынұлы атындағы өңірлік университет базасында ғылыми зерттеу жүргізетін форсайт орталығын құру жоспарланып отыр.
Сейітбек Қуанышбаев, А.Байтұрсынұлы атындағы Қостанай өңірлік университетінің ректоры:
- Ғылым академиясымен бірге орталықтар қандай бағытта, кіммен жұмыс істейді соны анықтау үшін зерттеулер жасап, талқылаулар жүргізіп жатырмыз.
Академия Президиумының көшпелі отырысының қорытындысында ғылыми қауымдастық пен өнеркәсіп арасындағы байланысты нығайтуға қатысты сараптамалық жазба әзірленді.
Мағауия Қалиев. Ермек Мұхамедияров, 24KZ
