Бүркіт балапандары "Сұңқар" тәлімбағында өсірілген.
Қазақстанда 2012-2019 жылдары жүзеге асқан "Үлесіңді қос. Табиғатты сақта" бағдарламасы жалғасын тауып, "Бүркіттерді сақтайық" жобасының аясында жас бүркіттер табиғат аясына ұшырылды.
Бастапқы жоба аясында 25 бүркіт өсіріліп, Алматы облысында ұшырылса, енді алдағы он жыл бойы бүркіттер бүкіл Қазақстан бойынша табиғат аясына жіберіледі.
Жоба авторларының айтуынша, оның аясында бизнес, ғылым және мемлекет күштерін біріктіру маңызды.
"Бұл – ұлттық және мәдени бірегейлікті бейнелейтін рәміздерді сақтау жолындағы маңызды қадам. Бүркіт – күштің, еркіндіктің және ұрпақтар сабақтастығының бейнесі. Бұл құс халқымыздың тарихы мен өзіндік санасымен тығыз байланысты. Бүркітті сақтау – тек экология мәселесі ғана емес, қоғамды біріктіретін құндылықтарды нығайтуға қосылған үлес", – делінген хабарламада.
Еске салайық, бүркіт – қызыл кітапқа енген сирек құс. Қазақстанда бүркітті сақтау жөніндегі ұзақмерзімді экологиялық жоба жүзеге асырылады. "Бүркіттерді сақтайық" жобасын Экология және табиғи ресурстар министрлігі Efes Kazakhstan компаниясымен бірлесіп жүзеге асырады.
Оқи отырыңыз: Қазақстанда бүркіттерді сақтау және көбейту бойынша жаңа шаралар қолға алынбақ
