Мемлекет басшысының тапсырмасына сәйкес, 2019 жылдан бастап ұлттық семсерлесу құрамаларында шетелдік жаттықтырушылар мен кеңесшілер жұмыс істей бастады. Осы жылдар ішінде қазақстандық семсершілер бірқатар маңызды жетістіктерге қол жеткізген, деп хабарлайды Egemen.kz.
Естеріңізге сала кетейік, 2020 жылы Токио Олимпиадасында Руслан Құрбанов 1/8 финалға дейін жетіп, Қазақстан тарихындағы ең үздік нәтижені көрсетті. Ал 2024 жылғы Париж Олимпиадасына ерлер құрамасы алғаш рет командалық жолдама алып, әлемнің үздік 8 командасы қатарына енді. Жекелей сында Руслан Құрбанов ширек финалға дейін жетіп, ұлттық рекордты тағы да жаңартқан.
2023 жылғы әлем чемпионатында Қазақстан құрамасы командалық есепте алғаш рет қола медаль иеленді. Ал жекелей бәсекеде Руслан Құрбанов жартылай финалға шықты. 2024 жылғы Азия чемпионатында қазақстандық семсершілер 9 жылдан кейін алғаш рет командалық сапы бойынша чемпион атанды. Финалда олар атақты Жапония құрамасын жеңді. Қылыш бағдарламасында да ерлер құрамасы сенсациялық түрде қола жүлде еншіледі.
Туризм және спорт министрлігінің хабарлауынша, Азия ойындарында қазақстандық сапы шеберлері ұзақ үзілістен кейін финалға дейін жеткен. Қазіргі уақытта ерлер сапы құрамасы әлемдік рейтингте 5-орында, ал жекелей есепте Руслан Құрбанов 8-орында тұр.
«Бүгін семсерлесуден ұлттық құрама өз тарихындағы ең үздік нәтижеге қол жеткізіп, әлем чемпионатының жартылай финалына шықты. Қазіргі әлем чемпионы – Италия құрамасын жеңген ұлттық құрама өкілдері Кирилл Проходов, Руслан Құрбанов, Вадим Шарлаимов және Эльмир Әлімжанов финал жолдамасы үшін Токио Олимпиадасының чемпионы, Париж Олимпиадасының күміс жүлдегері Жапония спортшыларымен шеберлік байқасып, қарсыластарына аз ғана басымдықпен жол беріп қойды», делінген хабарламада.
Айта кетейік, Қазақстан енді қола жүлде үшін тоғыз дүркін Олимпиада чемпионы Франциямен кездеседі. Франция бұл атақты 1908, 1924, 1932, 1948, 1980, 1988, 2004, 2008 және 2016 жылдары жеңіп алған.
Туризм және спорт министрлігі халықаралық тәжірибені енгізу, спортшылардың кәсіби деңгейін арттыру, медаль санын көбейту және саланы жан-жақты дамыту бағытында жүйелі жұмысты жалғастырып келеді.
