Қарағандыда әлеуметтік желіде мұсылмандарды «шошқа» деп қорлап, қазақтарды кемсіткен кәсіпкер Алика Мұхамадиева уақытша ұстау изоляторына қамалды. Оған Қылмыстық кодекстің 174-бабы 1-бөлігі бойынша «ұлтаралық араздықты қоздыру» бабы бойынша айып тағылып отыр, деп хабарлайды Skifnews.kz ақпарат порталы.
Соңғы күндері оның Threads желісіндегі пікірлері қоғамды дүр сілкіндірді. Қазақтарды «мамбет», «қалбит», «қазақшасөйлешник» деп атаған ол, мұсылмандарды «шошқа» деп кемсіткен. Бұл сөздер жұрттың ашуын тудырып, әлеуметтік желіде үлкен резонансқа айналды.
Қатты қысымға ұшыраған Мұхамадиева Threads-тегі парақшасын өшіріп, Instagram-да кешірім сұрап видео жариялады. «Мен қатты өкінемін», — деп ақталғанымен, жұрт оны кешірмеді. Бүгін тәртіп сақшылары оны ұстап, уақытша изоляторға қамады.
Қазір оған қатысты бұлтартпау шарасы әлі белгіленген жоқ.
Айта кетейік, Қазақстанда ұлтаралық және діни араздықты қоздыру Қылмыстық кодекстің 174-бабы бойынша жазаланады. Бұл бап бойынша айыпталушыға айыппұл салынуы, бостандығын шектеу немесе жеті жылға дейін түрмеге жабу жазасы қарастырылған.
Еске салсақ, биыл мамыр айында Солтүстік Қазақстан облысында Жансұлу Дархамбаева да дәл осы бап бойынша кінәлі деп танылып, екі жылға бас бостандығынан айырылған еді.
