Елде жанармаймен жүретін дәстүрлі көлікке қарағанда электромобиль таңдайтындардың қатары артып келеді. Статистика дерегіне сай, соңғы жылда еліміздегі электрокар саны 57%-ға артып, 15 мыңға жуықтаған.
Әсіресе Алматы, Астана, Шымкент қалаларында қызығушылық басым. Әзірге қазақстандықтар ел ішінде шетелдік электрлі темір тұлпарларды тізгіндеп жүр. Болашақта отандық зауыттар да бұл көлік түрін құрастыра бастауы мүмкін.
Кейінгі жылда елдегі электромобильдердің 1,5 есеге көбеюі сұраныс артып келе жатқандығын анық аңғартады. Автосүйер қауым нарықта бұл көлік бағасының анау айтқандай арзан еместігін түсінсе де, экологиялық тазалығын үлкен артықшылық деп санайды. Сосын қолдану кезіндегі шығыны едәуір аз. Электр энергиясымен қуатталатын темір тұлпар жанар-жағар май қажет етпейтіндіктен, қалтаға артық салмақ салмайды.
Дархан Қалтаев, Автоорталықтың техникалық директоры:
- Жанармай немесе дизель көліктерімен салыстырғанда электромобильдердің бағалары сол деңгейде деп ойлаймын. Бірақ электромобильдердің қызмет көрсету жағынан кішкене үнемділеу. Мысалы, бір жылда қызмет көрсету сапасынан 500 мың теңгеге дейін үнемдеуге болады. 5 жылда 2,5 млн-ға дейін жетеді.
Қазір көптеген ел жанармай отынының зиянды шығыны — көмірқышқыл газының ауаға шексіз тарауымен күресуде. Бұл көшті ілгерілетуге Қазақстан да мүдделі. Мәселен, осыдан бес жыл бұрын отандық автонарық үшін электромобиль таңсық болса, қазір керісінше, сұраныс артуда.
Жәдігер Тілеген, ҚР Көлік министрлігінің автомобиль көлігі және көліктік бақылау комитетінің басқарма басшысы:
- Қазіргі уақытта жергілікті атқарушы органдардың ақпаратына сәйкес, ел өңірлерінде 473 электр зарядтау станциялары бар. //өңірлерде қосымша 400-ге жуық тағы да осындай электр зарядтау станцияларын ұйымдастыру мен оларды салу бойынша жұмыс жүргізілуде.
Демек, алдағы уақытта өзге аймақтарда қажеттілік артса, атқамінерлер зарядтау стансаларын көбейтуге әзір. Сарапшылар Қазақстанда да электромобильдердің көбею тенденциясы күтілетінін болжап отыр. Қазіргі уақытта электр көліктерін жеке және заңды тұлғалар өз еркімен сатып ала алады. Сондай-ақ, елге электр көлігін әкелетіндерді кедендік баждан босату секілді салықтық жеңілдіктер бар.
Артур Мискарян, Автомобиль нарығын бақылау және талдау агенттігінің бас директоры:
- Біздің елдегі электромобильдерге сұраныс көлемін мына сандық деректер арқылы көруге болады: Жалпы автопаркімізде 5 жарым миллионға жуық жеңіл көлік бар. Солардың ішінен 14 мыңнан астамы электромобиль. Сұраныс белсенді болғанымен, шынайы сатып алу қаблеті Алматы, Астана, Шымкент қалалары мен Алматы облысында ғана байқалады. Яғни бұл төлем қабілеті жоғары, ірі қалалар.
Болашақта электромобиль өндірісі біздің елде де қарқын алуы мүмкін. Бұл жайында Үкімет басшысы малайзиялық ірі холдинг басшысымен келіссөз жүргізді. Себебі біздің ел заманауи технологияларды енгізу арқылы өндірістерді локализациялау, жаңа жұмыс орындарын ашу, машина жасау саласын одан әрі дамыту мақсатын қойып отыр. Биылғы бірінші тоқсанда салаға 55 млрд теңге инвестиция тартылған.
Авторлары: Рухани Әбдірахман, Ғалымжан Абдылахат
