Таяуда Премьер-министрдің орынбасары – Сыртқы істер министрі Мұрат Нұртілеудің Ауғанстанға жұмыс сапары аясында Орталық Азия мен Оңтүстік Азия арасындағы теміржолды салу мен пайдаланудағы негізгі қағидаттар туралы өзара түсіністік жөніндегі меморандумға қол қойды. Делегация құрамында Көлік вице-министрі Мақсат Қалиақпаров та болды.
Есте болса өткен жылы Ауғанстан, Өзбекстан және Біріккен Араб Әмірліктері Трансауған теміржол жобасын техникалық зерттеу бойынша өзара түсіністік туралы меморандумға қол қойған еді. Бұл теміржолы жобасы Орта Азия елдерін Ауғанстан арқылы Оңтүстік Азия елдерімен байланыстырады. Өзбекстан-Ауғанстан-Пәкістан үш жақты теміржол жобасының ұзындығы 760 шақырым, құрылыс құны 4,8 миллиард долларға бағаланған.
Ал біз айтып отырған меморандумның негізгі мақсаты – Ауғанстан аумағы бойынша екі кезеңде теміржол желісін, сондай-ақ Ауғанстан аумағындағы көлік-логистикалық орталықты салу, сондай-ақ «Тургунди-Герат-Кандагар-Спин-Болдак» жобасын іске асыру. Бұдан көретініміз, транзиті мен логистикалық хабын әртараптандыруды көздеген еліміз, Оңтүстік Азия мемлекеттеріне апаратын жолды өзіне ғана емес, айналасындағы елдерге де ашып бермекші.
Айтулы жобаның бірінші кезеңде «Тургунди-Герат» учаскесінде теміржол желісі мен қажетті инфрақұрылымды, сондай-ақ Герат қаласындағы көлік-логистикалық орталықты салу жөніндегі инвестициялық жобаны іске асыру жоспарланып отыр.
