Қазақстан Республикасының Көлік министрі Марат Қарабаев Ақтауда болған ұшақ апатына байланысты тергеу барысы туралы мәлімдеді, — деп хабарлайды Massaget.kz тілшісі.
Министрдің айтуынша, қазіргі уақытта тергеудің екінші кезеңі жүргізіліп жатыр.
"Қазақстан – тергеуді жүргізіп жатқан тарап. Кез келген тергеу бірнеше кезеңнен тұрады. Бірінші кезең – тиісті материалдарды жинау, ол аяқталды. Қазір біз екінші кезеңдеміз – жиналған материалдарды зерттеу жүргізілуде. Бұл кезеңде халықаралық мамандармен, соның ішінде ИКАО (Халықаралық азаматтық авиация ұйымы) сарапшыларымен бірлесіп Баку, Грозный және Ростов-на-Дону қалаларында болдық", – деді Қарабаев Сенаттағы брифингте.
Ақтаудағы апат: не болды?
2024 жылғы 25 желтоқсанда Ақтау әуежайынан үш шақырым жерде Azerbaijan Airlines (AZAL) әуе компаниясының Embraer ұшағы апатқа ұшырады. Ұшақ Баку–Грозный бағыты бойынша рейс орындап келе жатқан. Апат шұғыл қонуға әрекет жасаған кезде болған. Бортта 62 жолаушы және 5 экипаж мүшесі болған.
Тергеу және нұсқалар
ИКАО конвенциясына сәйкес, апатқа байланысты тергеуді Қазақстан тарапы басқарады. Оған Әзербайжан, Ресей, халықаралық сарапшылар мен Embraer компаниясының өкілдері қатысты. Қара жәшіктер алынып, халықаралық сарапшылардың қатысуымен шифрлану үстінде.
Әзербайжан БАҚ-тары, сондай-ақ Euronews пен Reuters кейбір жарияланымдарында апатқа Ресейдің әуе шабуылына қарсы қорғаныс жүйелері себеп болуы мүмкін деген болжамдарды көтерді.
2024 жылғы 28 желтоқсанда Ресей президенті Владимир Путин бұл қайғылы жағдай Ресейдің әуе кеңістігінде болғанына байланысты кешірім сұрап, қаза болғандардың отбасына көңіл айтты және жарақат алғандарға жылдам сауығу тіледі.
29 желтоқсанда Әзербайжан президенті Ильхам Әлиев ұшақ сырттан зақым алғанын, соның салдарынан басқару жүйесі істен шыққанын мәлімдеді. Оның сөзінше, радиоэлектронды соғыс құралдары арқылы ұшақ басқаруға көнбей қалған. Сонымен қатар, Әлиев Ресейге ресми талаптар қойғанын айтты.
Ұшақ бортында кімдер болды?
Қазақстанның ТЖМ мәліметінше, ұшақта:
62 жолаушы,
5 экипаж мүшесі болған.
Оның ішінде:
42 – Әзербайжан азаматы,
16 – Ресей азаматы,
6 – Қазақстан азаматы,
3 – Қырғызстан азаматы.
Қаза тапқандар арасында қазақстандықтар бар. Қазақстан азаматтарының ешқайсысы тірі қалмаған.
Тірі қалғандар арасында Әзербайжан, Ресей және Қырғызстан азаматтары бар.
Тергеудің алғашқы кезеңі не көрсетті?
4 ақпанда Қазақстанның Көлік министрлігі AZAL ұшағының апатына байланысты алдын ала тергеу нәтижелерінің есебін жариялады. Онда әуе кемесінің бүлінген, бір бөлігінің жанып кеткен фотосуреттері, сондай-ақ апат алдындағы ұшу сәтінің схемалық реконструкциясы ұсынылған.
Қызықты жаңалықтар мен видеоларды көру үшін TikTok арнамызға жазылыңыз!
