Қонаевта салынған балалар үйі жақында пайдалануға беріледі, деп хабарлайды 24kz.

Құрылысына 4 миллиард теңге жеке инвестиция салынған нысан 181 балаға арналған. Былтыр ғимараты апатты деп танылған Бағанашылдағы балалар үйінің тәрбиеленушілері тамыз айында осында көшіп келеді. Сөйтіп, балалар жаңа оқу жылы басталғанша бейімдеуден өтеді.

Алматыда орналасқан балалар үйінің іргетасы 1963 жылы қаланған. Содан бері күрделі жөндеуден өтпеген. Ауызсу, кәріз құбырлары шіріп, едені төмен түсіп кеткен. Қабырғасы сыз тартады. Алматы облыстық білім басқармасындағылардың айтуынша, бұл ғимарат былтыр апатты жағдайда деп танылған. Ондағы балаларды қауіпсіз жерге көшіру мәселесі туындағандықтан, жеке инвестордың қаржысына Қонаевта жаңа балалар үйі бой көтерді.

Заман талабына сай салынған ғимарат 10 шілде күні облыстық білім басқармасының балансына өтті.

Айжан Ізбасар, облыстық білім басқармасының бөлім басшысы:

- Осы балансқа берілгеннен бастап қазіргі біздің жоспарымыз Алматы қаласында орналасқан балалар үйіне біз қызметкерлеріне хабарлама тараттық. Бір ай уақыт ішінде ол кісілер өздерінің жұмысын ауыстыру, ауыстырмау туралы шешім қабылдайды. Ол әркімнің өз еркінде, көшетіндері көшеді, қалатындары қалады қызметкерлер. Ал балалар бірінші қыркүйекке дейін кезекпен барлығы осы жерге көшірілетін болады.

Ақмарал Атенбекова, облыстық білім басқармасы басшысының орынбасары:

- Осы оныншы ықшам ауданда лицей бар бізде жаңадан ашылған. Сол лицейіміз қазақ тілінде оқытатын мектеп. Сонымен қатар бізде осы Қонаев қаласында бесінші, үшінші және гимназия бар Шоқан Уәлиханов атындағы орыс тілді бөлімдегі балалар білім алатын. Осы мекемеде біздің балаларға арналған автобусымыз бар. Тасымал ұйымдастырылады міндетті түрде. Балалар міндетті түрде барлығы оқумен қамтылады.

Бағанашылдағы балалар үйі заңды түрде облыстық болғанымен, өзі Алматыда орналасқан. Сол себепті ондағы тәрбиеленушілерді тіркеуге алып, жеке куәлік беру, баспана кезегіне қою мәселесінде біршама кедергі туындайтын.

Роза Бекішова, Алматы облыстық №1 балалар үйінің басшысы:

- Балаларды біз пропискаға тұрғыза алмаймыз, үй кезегіне қоя алмаймыз. Өйткені жер Бостандық ауданына қарағанымен, біз заңды түрде Қарасай ауданына тіркелгенбіз акиматқа. Ал Қонаевқа барсақ, біз сол Қонаевтағы мекемеге тіркелеміз. Балалар үй кезегіне қойылады. Сол жерден пропискаға тұрады. Бұл жерде үлкендердің жағдайын емес, біз балалардың жағдайын ойлауымыз керек.

Балалар үйінің тәрбиеленушілері Қонаевтағы жаңа ғимаратқа көшкен сәттен бастап ресми түрде облыс тұрғыны ретінде тіркеледі. Ол өз кезегінде балалар үшін жаңа мүмкіндіктерге жол ашады. Ал инвестор компания алдағы уақытта Еңбекшіқазақ ауданынан балалар шығармашылығы орталығын салуға кіріседі. Онда мектеп оқушыларына арналған ең ірі шеберханалар, үйірмелер мен зертханалар ашылады деп жоспарланып отыр.

Авторлары: Ардақ Айбарұлы, Аманжол Жөңкешов