Оралда төрт жыл бойы құмар ойынға бәс тіккен шенеунік қызметінен қуылды, — деп хабарлайды Massaget.kz тілшісі Бас прокуратураға сілтеме жасап.
2024 жылғы 15 наурызда Атырау қаласында өткен Ұлттық құрылтай отырысында Мемлекет Басшысы жариялаған тапсырмаға сәйкес, сыбайлас жемқорлыққа қарсы іс-қимыл туралы заңнамаға өзгерістер енгізілді. 9 қыркүйектен бастап, мемлекеттік қызметшілердің, оның ішінде онлайн форматта, құмар ойындары мен бәс тігуге қатысуы сыбайлас жемқорлыққа қарсы шектеулерді бұзу ретінде танылады.
Орал қаласының прокуратурасы осы нормалардың сақталуына талдау жүргізді. Орал қаласы әкімдігінің, мемлекеттік кірістер және қалалық полиция басқармаларының жекелеген лауазымды тұлғалары букмекерлік кеңселер арқылы құмар ойындарға қатысқаны анықталды.
Бұл деректер бойынша Орал прокуратурасы Орал әкімдігіне, Мемлекеттік кірістер басқармасына және Батыс Қазақстан облысының Полиция департаментіне қадағалау актілері енгізілді.
Оларды қарау қорытындысы бойынша 24 лауазымды тұлға тәртіптік жауапкершілікке тартылып, оның ішінде 16-сы атқарып отырған лауазымдарынан босатылды.
Мысал ретінде, "OLIMPBET" ЖШС-нің мәліметтеріне сәйкес, Орал әкімдігінің бір қызметкері 2021 жылғы 5 маусым мен 2025 жылғы 22 қаңтар аралығында өзінің жеке шотына 34 047 142 теңгеден аса қаражат салған. Оның ішінде, заңнамадағы өзгерістер күшіне енгеннен кейін — 1 741 000 теңге салып, оның 971 000 теңгесін ұтылған. Осы мән-жайларға байланысты бұл қызметкер лауазымынан босатылды.
Орал прокуратурасы сыбайлас жемқорлыққа қарсы заңнаманың, оның ішінде сыбайлас жемқорлыққа қарсы шектеулердің сақталуына жүйелі түрде қадағалау жүргізуді жалғастырады.
Қызықты жаңалықтар мен видеоларды көру үшін TikTok арнамызға жазылыңыз!
