Шымкент қаласындағы бірқатар жекеменшік оңалту орталығының жұмысы тоқтап тұр. Мекемелер әлеуметтік лицензиясы болмағандықтан жұмыстарын жалғастыра алмай келеді. Сауықтыру орындары басшылары бүгін өңірге іс-сапармен келген Мәжіліс депутаты, «Respublica» партиясы фракциясының мүшесі Динара Наумовамен болған кездесуде, осы мәселені көтерді. Мәжілісменнің айтуынша бүгінде бұл мекемелерге бақылауды күшейтіп, мұқтаж жандарды емдеу мен әлеуметтік бейімдеу тәсілдерін қайта қарау қажет. Депутат сапар барысында әйелдер колониясы мен «Көмек» тұрмыстық зорлық-зомбылық құрбандарына көмек көрсету орталығына да барды. Медициналық қызметтердің қолжетімділігі мен сапасына қатысты мәселелерді талқылады.
Динара Наумова, ҚР Парламенті Мәжілісінің депутаты:
Бұл мәселе еліміздің барлық аймағына тән. Сондықтан оған жүйелі және жан-жақты қарауымыз керек. Әрине, түйткілді жәйттер жылдам шешіледі деп айта алмаймын. Заңдар мен заң актілерін өзгерту біршама ұзаққа созылатын іс. Дегенмен салалық министрлік өкілдерімен бүгінгі көтерілген мәселелерді талқылап, ортақ шешім қабылдайтын боламыз.
Ғани Қалмаханов
