Қарағанды облысында жаңа буындағы өнеркәсіптік өндіріс қарқынды дамып келеді, деп хабарлайды 24KZ. Мәселен, Саран қаласында орналасқан Tengri Tyres зауыты – елдегі шина шығаратын жалғыз кәсіпорын. Ел нарығын түгел дерік қамтамасыз ететін өндіріс орны жылына 3 миллион жеңіл көлікке арналған шина мен 500 мың жүк көлігі шинасын шығарады. Кәсіпорында 800-ден астам адам жұмыс істейді. Алдағы уақытта жұмысшылар санын 1100-ге жеткізу жоспарланып отыр.
Сонымен қатар тұрмыстық техника өндірісі де өркендеп келеді. Мұнда теледидар, кіржуғыш мәшине, пеш және шаңсорғыш сынды тауарлар шығарылып, ірі компанияларға сатылады. 2028 жылға қарай зауыт жылына 1 миллионнан аса техника шығаруды жоспарлап отыр. Қазір кәсіпорында 300 адам жұмыс істейді. Алдағы уақытта штат саны мыңнан аса қызметкерге көбейеді.
Анисия Николаева, жұмысшы:
- Бізде алты «линия» бар. Теледидар, шаңсорғыш, кіржуғыш мәшине, пештер бар, «вытяжкалар» бар. Соның бәрін шығарамыз. Бізде «комплект» алып келеді, біз «сборка» жасаймыз. Ауыр еш нәрсе жоқ. Тек қана ойланып, мұқият істеу керек.
Ал автобус өндіретін кәсіпорын жылына 1200 автобус пен 10 мың коммерциялық көлік шығара алады. Мұнда өндірілген техникалар көптеген аймақта коммуналдық қызмет, тау-кен өндірісінде қолданылып жатыр. Зауыт сапа мен қауіпсіздікке ерекше назар аударылады. Бейнебақылау жүйелері, навигация, ауаны баптау, контактісіз төлем және көтеру пандусы енгізілген. Кәсіпорында 850-ден астам адам жұмыс істейді. Зауыт ішінде мамандарды даярлайтын корпоративтік университет бар.
Айта кетейік, елде осындай 55 индустриялдық аймақ бар. Мұндағы инвесторларға мемлекет тарапынан түрлі жеңілдіктер қарастырылған.
Азамат Панбаев, ҚР ӨҚМ Өнеркәсіп комитетінің төрағасы:
- Өндірістік кешен саламын деген инвесторға электр желілерін, сумен, жолмен қамту сияқты мәселелерді Үкімет тарапынан қаржыландыру арқылы шешіледі. Одан кейін тауарды сату мәселесі бар. Сол жерде, мысалы, бізде үлкен жер қойнауын пайдаланушы компаниялар бар. Солардың сатып алуын реттеу арқылы отандық өнімді сатып алуға атсалысамыз.
